رووژ جەهانی ژنەیل ٨ ئادار
شەفەق نیوز/ رووژ جەهانی ژنەیل بوونەیگ جەهانییە ک گشت ساڵیگ لە ٨ی مارس ئاهەنگ ئەرای سازکەن، ک جۊر رێز و خوەشەویستیە وەرانوەر دەسکەفتەیل ژیان لەرۊی کۆمەڵایەتی و سیاسی و پیشەیی و ئابووریی.
لەی رووژە لە وڵاتەیلیگ جۊر چین و روسیا و کوبا ژنەیل پشوو وەپیان وەخشیەێد و تۊنن نەچنە بان کارەیلیان، لە بڕیگ وڵاتیش توانا و هێز ژنەیل بەرز گریەێد و جۊر دیاری گوڵ وەپیان دریەێد.
ئاهەنگ سازدان وەی بوونە لەدۊای یەکەم کۆنگرەی یەکێتی دیموکراتی جەهانی ژنەیل دەس وەپیکرد ک لە ساڵ ١٩٤٥ لەپاریس رێکخریا، و یەکەم ئاهەنگ رووژ جەهانی ژنەیل کریا، سەرەرای ئەوەش بەشیگ لە تۊژەرەیل ئۊشن ک رووژ جەهانی ژنەیل دۊای بایکۆت ژنەیل لە کارکردن رۊدایە ک لە ویلایەتە یەکگرتۊیەیل ئەنجامی دانە، ئی ئاهەنگەیش جۊر رێزیگ و بەرز نرخاندن دەور ئافرەتە لە گشت مژاریلە لە سەرانسەر جەهان.
