نێچیروان بارزانی داوا کەێد گرنگی زیاتر وە کاندیدکردن ژن بیریەێد لە هەڵوژارن هاتگ
ئەوەیش لە بەیاننامەیگ لە سەرۆکایەتی هەرێم کوردستان هات و بوونەی رووژ جەهانی ژن.
سەرۆک نێچیروان بارزانی لە بەیاننامەیگ وەی بوونە وت: پیرووزبایی لە گشت ژنەیل کوردستان و عراق و جەهان کەم وە رووژ جەهانی ژن، و پشتگیری لە تەقەلا و کار و رەنجیان کەم ئەرا وەدەسهاوردن یەکسانی و گشت مافەیل ژن وەگشت باوەڕ و توانایگ و هەر جویر هەمیشە، و ئومید پیشکەفتن و سەرکەفتن ئەرایان خوازم.
وتیش: لەی ساڵیادە، و رێز و پیزانین یاد گشت ژنە ویرەدارەیل کەیمن کە لە ژیان خەباتیان ئەرا مقیەتیکردن مافیان و وەرگری لەلی بوینە قوربانی، یا وەناحەقی بوینە قوربانی تونەڕەوی و هویر تونوتیژی و دویاکەفتگ، و دووپات لە وسیانمان وەگشت هازیگ لە روی هەر هویر و وتار و ستەمیگ کەیمن یا دەسدرویژی یا تەنگەوکردن و ستەم وەبان ژن.
سەرۆک هەرێم کوردستان وتیش: لە وەختیگ وە گەشبینی و چەو ئومید نووڕیمنە کار و هاوبەشیکردن بەشداریکردن ژن لە گشت چینەیل ژیان لە کوردستان، دووپات کەیمن کە ئیمە تەمای زیاتر دیریمن، و هەر جویر هەمیشە وەردەوام بویمن لە کارکردن و پیشکەشکردن گشت تەقەلایگ ئەرا مسۆگەرکردن زیاتر لە رۆڵ و ئامادەبوین و دەرفەت و پایەی ژن لە گشت کەرت و چینەیل ژیان، و داوا لە لایەنەیل سیاسی کرد گرنگی زیاتر وەژن بیەن لەی هەڵوژاردن هاتگە.
هەمیش وت: کۆمەڵگایگ ئازاد و شارستانی پیشکەفتگ ئارام دڵنیا نەوەیگ تەندروسی وەتوانا دروس کەێد، ئەوەیش وەبی ئازادی و یەکسانی ومافەیل ژن تیەتێدە دی، و زەمینە ئەرا بانانیگ خاستر سازێد، ئەراوە ئەرک گشتیە پاڵپشتی لە گشت ئاستەیل کۆمەڵگا بکەێد و پشتگیری وەی باوەڕ و فامستنە لە خەبات ژن بکەیمن و تا کۆتایی وەردیان بویمن.
لە سەرەتای مانگ ئادار، نێچیروان بارزانی سەرۆک هەرێم کوردستان، بڕیاریگ هەرێمی دەرکرد ئەرا دیاریکردن رووژ ١٠ی حوزەیران ٢٠٢٤ جویر مەوقەیگ ئەرا هەڵوژاردن گشتی ئەرا خول شەشەم لە پەرلەمان کوردستان.
دویای ئەوە، کۆمسیۆن باڵای سەروەخوەی هەڵوژاردن، وازکردن کەر ئەرا توومارکردن لەڕوی ئەو هاوپەیمان و حزبەیل کوردە راگەیان کە ئارەزوو بەشداریکردن لە هەڵوژاردن پەرلەمان هەرێم کوردستان دیرن.
