خیزانیگ لەناو ئاگر خەسەخانەی ئبین خەتیب برای بویچگیان درارن و خوەیان سزیەن
شەفەق نیوز/ باوگەگە لەوەر تووشهاتنی وە ڤایڕۆس کۆڕۆنا، لەناو خەسەخانەی ئبین خەتیب خەفت، و خیزانەگەی لە داڵگ و سێ کوڕی هاتنە سەردانی، لەو مەوقە بوی ک خەسەخانەگە گوڵپە کرد.
سەرچەوەیگ لەناو پرسەی ئەو خیزانە لە بەغداد، ک باوگ و داڵگ و دوو کوڕیان لەناو خەسەخانەگە سزیان و گیانیان لەدەس دان، ئەرا ئازانس شەفەق نیوز وت: پەنج کەس لەی بنەماڵە لەمەوقەی رووداو ئاگر خەسەخانەی ئبین خەتیب لەناو بەش چارەسەری کۆڕۆنا بوین، ئەو بەشە ک وەگشتی ئاگر چگە لی، چوونکە باوگیان «محسن فلەیح» تووش ڤایڕۆس کۆڕۆنا هاتوێد، و نزیک بوی خاسەو بوود، و ژنەگەی وەگەرد سێ کوڕی (سەعەد، و ئەزهەر، و غەیس) وەگەرد یەکەوە لەلای باوگیان بوین، و تەنیا کوڕە بویچکەگە وەشیوەی ئەڵاجەوییگ لە ئاگرەگە دەرچگ.
سەرچەوەگە وتیش؛ لە مەوقەی رەسین ئاگرەگە ئەرا ناو ئەو شوینە ک ئی خیزانە لەناوی بوین، کەسیان قمشی نەکرد باوگەگە وەجی بیلێد و گیان خوەی لەی ئاگرە قورتار بکەێد، و کەفتنە دەور باوگیان تا وەگەرد یەک گشتیان بسزیەن، وەلی لە مەوقەیگ، سەعەد کوڕە گەورەگە، برای بویچگ خوەی لە پەنجرەگە خستە خوار، تا قورتاری لەو ئاگرە بکەێد، و خوەی و داڵگی و باوگی و ئەو برای تری لەناو ئاگرگە تاویانەو.
