یەک کوشیان و هەفت زەخمدار لە رووداوەیلیگ جیاجیا لە بەغداد

شەفەق نیوز/ سەرچەوەیلیگ ئەمنی، ئمڕوو سێشەممە، خەوەردان لە کوشیان یەک کەس و زەخمداری هەفت کەس تر وە رووداوەیلیگ جیاجیا لە ناوچەیلیگ لە بەغداد پایتەخت.

سەرچەوەیلە ئەرا ئاژانس شەفەق نیوز وتن: رووداویگ هاتووچو وە ماشینیگ مارکەی بی ئێم دەبلیو لەوەر تەقین تایەرەگەی داگە سەنگ کۆنکەریتییگ لە ری لەتیفیە و بویە هووکار کوشیان رانندەگەی.

وەگورەی سەرچەوەیلە؛ کابرایگ تەقە لەبان براژنی وەرد و دوێەتەگەی لە ناوچەی رەشاد کرد، و بویە هووکار زەخمداری پای ژنەگە و ران دوێەتەگە، ئەوەیش لەوەر مرافەیگ لەبان مناڵەیل.

سەرچەوەیلە وتنیش؛ مرافەیگ لەبان ژنیگ کەفتە ناونی بڕیگ لەناوچەی زەعفەرانیە و رەسیە تەقەکردن، و بویە هووکار زەخمداربوین ٥ کەس.