پۆلیس ئەمریکا ئاشکرای پەلاماردەر سەلمان رەشدی کەێد

شەفەق نیوز/ پۆلیس ئەمریکا ئاشکرا کرد ک جیوەجیکەر پەلامارەگە لەبان نویسەر بەریتانی هندی ئەلموند نویسەر روومان "ئایەتەیل شەیتانی" سەلمان روشدی، ک گەنجیگە لە تەمەن ٢٤ ساڵان وەناو هادی موتەر لە دانیشتگ ویلایەت نیوجیرسی.

پۆلیس وتیش: توومەتبارەگە وەچەوو دالە مل وزگ روشدی، و باس وەردەوامی هەماهەنگی وەگەرد نویسینگەیل لێکۆڵینەوەی فیدراڵی کرد تا بچوودە بندروس هووکارەیل ئی پەلامار خوینینە. 

کارۆڵ مارگۆفیچ خانمە رووژنامەوان ئەمریکی وت: توومەتبارەگە ناوی هادی موتەر، مووڵەت رانین ماشین ساختەیگ وەلای بویە وەناو باسم حسێن مەغنیە لە مەوقەی دەسگیرکردنی.   

سەلمان روشدی، وەرجە وانەیگ ک تواستیە لە پەیمانگای Chautauqua ئەرا ئاداب لە نیویۆرک بیەێد، کەفتە وەر پەلامارەیگ.  

روشدی وە دەرکردن دویەم روومانی وەناونشان "مناڵەیل نیمە شەو' لە ساڵ ١٩٨١ ناودیارەو بوی، ک ڕێز جەهانی و خەڵات پۆکەر ئەدەبی وەگەرد،  ک روومانەگە باس میژوو هندستان لە داگیرکەر بەریتانیا کەێد.  

باوجی روومان "ئایەتەیل شەیتانی" ک لە ساڵ ١٩٨٨ دەرکرد، قسە وباسیگ فرە لەبانی کریا، وبەشیگ لە موسەڵمانەیل جویر سووکایەتی وە پەیغەمبەر محمد دانانەی، و ئایەتوڵڵا خومەینی فتوای کوشتنی دەرکرد. 

روشدی ک کافرە، و لە وڵات هند لە باوگ و داڵگیگ موسەڵمان پەیا بویە، دویای ئەوە ک پویلیگ ئەرا بکوشی دیاری کریا، ناچار بوی خوەی لە چەو مەردم بشارێد.  حکومەت بەریتانیا روشدی خستە ژیر پاسەوانی پۆلیس لە بەریتانیا،  و ئەڵگەردانەیل وبڵاوکەرەیلی کەفتە وەر تەقەلای کوشتن.  

لە ساڵ ١٩٩١ ئەو کەس یابانیە، "هیتوشی ئیگاراشی" ک ئەڵگەردان کتاوەگەی کەرد وە چەقو کوشیا.  

روشدی وە ئاشکرا دیار نەیا تا لە کۆتایی نەوەتەیل سەدەی گوزەشتە هەنای ئیران راگەیان ک پشتگیری کوشتنی نیەکەێد.