ژن وەرین سەلمان روشدی باس دڵینیایی لە تەندروسیی کەێد
شەفەق نیوز/ ژن وەرین روومانویس بەریتانی، سەلمان روشدی، باس دڵنیایی خوەی کرد، دویای ئەوە ک روشدی دەسکردە خاسەوبوین لەو زەخمەیل چەقوە ک رووژ جمعەی گوزەشتە لە ناوەندیگ کەلتوری لە نیویۆرک کەفتە وەر پەلاماریگ.
بادما لاکشمی، لەبان تویتەر نویسان خوەشهاڵم ئەرا خاسەوبوین سەلمان روشدی دویای شەوەگەی رووژ جمعە، ئاخری هەناسیگ کیشایمن، ئیسە ئومید خاسەوبوین وەزوی خوازیمن.
ئی پۆستە لەلایەن لاکشمی ٥١ ساڵان، ک لە ساڵ ٢٠٠٤ تا ٢٠٠٧ ژن روشدی بوی، دویای رووژیگ تیەێد لەو راپۆرتە ک رووژنامەی دەیلی مەیل بەریتانی بڵاوی کرد ک وت: لاکشمی وەگەرد دووسەگەی لە یەکیگ لە چیشتەخانەیل نیویۆرک دانیشتیە.
لاکشمی نویسەر ئاشپەزیە و نمایشکار پڕتاڵە وپیشکەشکار بەرنامەی تەلەفزیۆنیە، لە هیندستان پەیا بویە و ڕەگەزنامەی ئەمریکیە، لە ساڵ ١٩٩٩ روشدی ناسیە، و دویای پەنج ساڵ شوی وەپی کردیە، و تەنیا ٣ ساڵ وەگەردی مەنیە.
روشدی دویەکە لە خەسەخانە تەندروسیی سەخت بوی، باوجی ئامێر هەناسەگەی لاوردن، ک هیلێد قسە بکەێد، و هیمان جویر جارانی هەنەکی کەێد، ئەوەیش وە گەورەی بەیاننامیگ لەلایەن زەفەر کوڕ روشدی.
روشدی لە دویای بڵاوکردن دویەم روومانی" مناڵەیل نیمە شەو" ک لە ساڵ 1981 بڵاویکرد ناوبانگ دەرکرد، ک رێزلێنان جەهانی و خەڵات "بوکەر" ئەدەبی وەپی وەخشریا.
باوجی روومان " ئایەتەیل شەیتانی" ک لە ساڵ 1988 دەریکرد، مشتومڕ گەپیگ لەدویای خوەی هاورد، ک رابەر باڵای وەرین ئیران، روحولا خومەینی ، فەتوای رشانن خوینی دا، فرەیگ لە موسڵمانەیل رۆمانەگە وە پەلاماریک وەبان پەیامبەر زاننێ.
