سەلمان روشدی.. چەویگی کوور بوی و دەسیگی گڵووڵە
شەفەق نیوز/ سەلمان روشدی، ئەو ئەدیب بەریتانیە ک لە ئاب گوزەشتە لە ئەمریکا کەفتە وەر پەلاماریگ، دیەی چەویگی لەدەس دا، و دەسی گڵووڵە بوی، و هەمیش تویش چەن زەخمیگیش هاتیە.
وەگورەی قسەی ئەندرێ وایلی وەڕیەوبەر کارەیل روشدی، ئەرا رووژنامەی "ئیل بایس" ئیسپانی وت: روشدی نووڕین چەویگی لەدەس دا و سێ زەخم مەرگبار لە ملی هەس، و یەک دەسی گڵووڵە بویە، چوینکە دەمارەیل باڵی بڕیانە، و کەفتە وەر ١٥ زەخم لە سینە و ترینجگ.
وایلی دیاری کرد ل زەخمەیلی فرە قویل بوین، و پەلامارەگە وەحشیانە بوی، وەلێ ئەوزەڵ کەێد، و یە یەکەم جارە ئاشکرا لە تەندروسی ئەو ئەدیبە بکەێد، وەبی ئەوەگ دیاری بکەێد ئەگەر هیمان لە خەسەخانە خەفتیە یا نە.
لە ١٢ی ئاب گوزەشتە، روشدی ئامادەی خوەی کردیاد تا لە کۆڕیگ لە باکوور ویلایەت نیویۆرک ئەمریکا بەشداری بکەێد، تا وەناکاوەو کابرایگ هاتە بان مێزەگەی، و چەن دەسە چەقوویگ لە مل وزگی وەشان.
و ئەو کابرای پەلاماردەرە وە کوتپڕ دەسگیر کریا، ک پەلامارەگەی لەبان نویسەر "ئایەتەیل شەیتانی" جیوەجی کردیە.
کابراگە ک پەلامار روشدی دا، ئەمریکیە لە بنچینەی لوبنانی، وەناو هادی مەتەر، لە تەمەن ٢٤ ساڵان.
لە ساڵ ١٩٨٩، دامەزرینەر کۆمار ئیسلامی لە ئیران، ئایەتولڵا خومەینی، فەتوای کوشتن نویسەر رومانەگە دەرکرد.
