ئەوسا جویر بەهەشت بویە.. راپۆرتیگ بەریتانی باس (ئەهوار) عراق کەێد.. وینە

ئەوسا جویر بەهەشت بویە.. راپۆرتیگ بەریتانی باس (ئەهوار) عراق کەێد.. وینە
2023-01-24T17:35:46+00:00
شەفەق نیوز/ رووژنامەی گاردیان، راپۆرتیگ وەگەرد بڕیگ وینە بڵاو کرد، باس ئی رەوشە کرد ک (ئەهوار) و خەڵک (ئەهوار) وەپی رەسینە،  و وەرجەیەگ بچیمنە ناو راپۆرتەگە ئویشیمن (ئەهوار) بڕیگ گوڵەم ئاوە، ک کەفنە باشوور عراق لە زیقار و عمارە، و تاکەگەی وەپی ئیوشن (هۆر) و هاتێ ئی وشە هەر کوردی بوود، و بیگومان هەرگیز عەرەبی نییە.

راپۆرتەگە ئویشێد ئەو هۆرەیلە جاران جویر بەهەشت بوینە، باوجی قەیران کەشوهەوا و هشکەساڵی ویرانیان کرد. 

رووژنامە بەریتانیەگە لەو راپۆرتە ک ئاژاتس شەفەق نیوز ئەڵگەردانی کرد وت: دانیشتگەیل هۆر حوێزە لە باشوور عراق خاوەن میژوویگ کۆنن لە ژیان ناو فرەترین زەویەیل ئاوی هەمەڕەنگی لە جەهان، و ئیسە ئەو ناوچە بویەسە نیمچە بیاوانیگ لەوەر هشکەساڵی و قەیران کەشوهەوا، ک ئەو بەنداوەیلە ک ئایم دروسیان کرد ویرانیان کرد، و هەزاران خیزان ناچار بوینە چوڵیان بکەن.

راپۆرتەگە دیاری کرد ک هۆر حوێزەگ چەم دیجلە و فورات لەناوی یەکەو گرن، وەرجە ٥ هەزار ساڵ دانیشتگەیل لەناوی بویە، و دویاتریان عەرەوەیل ئەهوار بوینە، لە بان کشتوکاڵی و ماسی و راو ژیان کردنە. 

 وتیش: ئەو هشکەساڵی درویژە، و ئەو پلەی گەرمی بەرزە، وەگەرد ئەو بەنداوەیلە ک لەبان سەرچەوەیلی لەناو تورکیا و ئیران بینا کریان، هیشت ئی سیمای سرووشتی دەگمەنە، بکەفێدە بان زەوی سیا.

راپۆرتەگە وتی: هۆرەیل بوینە ئاوەڕۆی تەنک، ئاوەگەی بەش ژیان مەردمەگە نیەکەێد،ک فرە لە عەرەوەیل ئەهوار ناچار بوین شوینەگە چووڵ بکەن، و لە کنار شارەیل داکاسیەن، و تەقەلای دروسکردن ژیان نوویگ ئەرا خوەیان دان. 

راپۆرتەگە باس عەبدولوەلید عەبدولڵا لە تەمەن ٥٠ ساڵە کرد، و لەیلا جەبار حەسەن ژنی ک لە تەمەن ٤٤ ساڵەس، لە پەنجرەی ماڵەگەی نووڕێد، ک وە درویژی نەوەیلیگ لەبان ئەو برنج و سەوزە ژیان کرد ک لە ئەهوار حوێزە کاڵیاد، وەگەرد ئیوەتکردن گامیش، و راپۆرتەگە لەزوان عەبدولڵا وت: ئەهوار هەکاتی بەهەشت بوی، و خانەوادەگەی توەنست لە هەر درەویگ یەک مەلیۆن دینار وەدەس بارێد، وەلێ دویای هشکەوبوین ئاوەگە، درەختیش مرد.

 عەبدولڵا ئویشێد: دی کشتوکاڵی نەما، ناچار بوین واز لە گشت چشتیگ بارم، ک واران و ئاو نییە، دی وەچە چشتیگ بکاڵێ؟.

راپۆرتەگە وتیش: خیزانەگە واز لە بووسان خوەی هاورد، و روی وەرەو ناوچەی مشرحە کرد وەمینەی کار، و کەفتنە کەلاوەیل کنار شارەیل، ک عەبدولڵا ئیرنگە پاسەوانی لەناو پڕۆژەیگ حکومەتی چووڵیگ کەێد ئەرا پاڵین ئاو،  و مانگانە ٤٠٠ هەزار دینار کەفێدە دەسی.

 راپۆرتەگە لە زوان عەبدولڵا وت: لەبانمان زاڵ بوینە، و مووچە وەپیمان دەن، وەلێ ئازادی لەدەسمان چگ، و ئیمەیش ناچاریمن ئەو کارە بکەیمن. 

راپۆرتەگە وتیش: خانەوادەی عەبدولڵا هەکاتی هاوسایلیان رەنج کیشن، ک عەبدولڵا ئویشێد: جاران جویر پاتشا بویمن، ک خاوەن زەوی سەوز و دار فرەیگ بویمن، وەلێ ئیسە ئەوە نەما، و مەردم ریزمانیش کەمتر گرن.

لەیلای ژنی، راپۆرتەگە باسی کەرد، ک هویر ژیان ناو دار و بووسان کەێد، و وت: هووکارە بوینمە ئازا بویمن، ئەو مەوقە خوەمان وە کەسەیلیگ گرنگ زانستیمن، وەلێ ئیرنگە نە.

راپۆرتەگە وتیش: لەیلا ئەرا یەکەمین جارە بویە فەرمانبەر، و کار لە ماڵیگ کەێد، و مانگانە مووچە گرێد، و ئەو کارە ئەرا ژنەیل ئەهوار چشت حەرامیگ بوی، ک لە دەیشت ماڵەگە کار بکەن، باوجی ئیرنگە مانگیگ ٥٠٠ هەزار دینار گرێد، ک پویلی لە شویەگەی زیاترە. 

راپۆرتەگە ئیجا باس عەبدولڵا خالد لە تەمەن ٦٦ ساڵە کرد، ک مامووستاس لە مەکتەویگ دەیشت ناوچەگەی خوەی، ک قەیران کەشوهەوا هشک زەویەگەی کرد، و پڕ مەکتەوەگەی لە مناڵ خانەوادە ئاوارەیل کرد، لەوانەگ لەوەر قەیران کەشوهەوا هاتنەسە ئەولا.

راپۆرتەگە وتیش: ٢٥ خوەنەوار لەناو پۆلەگە بوین، و ئیرنگە ٨٥ خوەنەوار هاناوی، و خالد پرسیار کرد ئایا چوین جویر مامووستا وەگەرد ئەوە رەفتار بکیمن؟ یە کار مەینەتییگە، وەلێ نیەتوەنیمن واز لەی مناڵەیلە باریمن.

زەینب ٤٥ ساڵانیش، ک لەناو کوشکیگ کار کەێد، راپۆرتەگە لە زوانی ئویشێد: ئەو زەویە ک جاران لەناوی بویە ئیسە بویەسە نیمچە بیاوانیگ، و ئیسە هەفت مناڵ هابانی، و بایەتە کار ئەرا ئیوەتکردنیان بکەێد، چوینکە شویەگەی بیمارە.

زەینەب هەمیش ئویشێد: ناچارم کار بکەم، و ئەگەر لەناو ماڵ بنیشێد، دی خواردن نییە، و چاریەیگتر نییە.

لەلای خوەییش؛ سەتار جەبار ٥٢ ساڵان ک پەکی کەفتیە و پشت وە کوڕەگەی بەسێد تا تیکە نان خانەوادەگەی درارێد، ئویشێد: ئەهوار جویر بەهەشتە، چمای پاتشا بویمن، و هەر چشتیگ بخوازیمن وەدەسمان کەفێد، و مەردم لە شارەگە هاتیانە سەردان زەویمان تا وای پاکیگ هەڵمژن، و ئیرنگە وەوجویرە نەما، و جەبار وتیش: بەشیگ لە مەردمەگە لەناو شار دڵیان تەنگ بوود، ک نە کار نە خواردن هەس.

 و ئەحمەد کوڕی، تەمەنی ٢٤ ساڵە، راپۆرتەگە لە زوانیی وت: هەنای ژیان ناو ئەهوار خاس بوی، مەردم هاتیانە ماڵمان، و مکیسمان ئەرا کارکردن کردیان، و ئیمە وەپیان خەنیایمن، ئیمە و فەرمانبەری کوجا مەرحەبا؟ ک ئیمە لەناو زەوی خوەمان خوەشهاڵیمن و گشت چشتیگ دیریمن.

ئەحمەد وتیش: باوەڕ نەکردیمن رووژیگ باێد و پەنا و کار فەرمانبەری بوەیمن، و ئیرنگە هەس وە بیئومیدی کەیمن، ک ئیمە بویمنە یەکەمین نەوە بچوودە ناو ژیان نووە. 

راپۆرتەگە ئیجا باس غالب عەمون ٥٠ ساڵان کرد، ک وەپی وت؛ یە دویاترین ئەو کشاورزەیلە بوی ک ئەهوار هیشتە جی، ک گشت ژیانی لەورا لە راوکردن و ئیوەتکردن گامیش گوزەران کرد، هەکاتی باوگ و باوانی ئەرا ساڵەیل فرەیگ.

عەمون ئویشێد: نزیک بویم وەگەرد مەردمەگە ئەهوار وەجی بیلم، و دەس ئەرا ئەو کوڵەمەیل ئاو بویچگە لەناو زەویە هشکەگە دڕا کرد، هەر ساڵیگ وەرەو گەرمتر چوود، و واران خاسیش هەکاتی جاران نیەوارێد، وتیش: کەمئاوی، کشتوکاڵی و راوماسی ویران کەێد، وتیش: هەنای گامیش تیر ئاو بیاشتاد ٣٠ لەتر شیر دیرێد، وەلێ وەبی ئاو بوودە ١٠ لەتر.

  عەمون وتیش: ئەگەر ئمساڵ واران نەوارێد، گومان دیرم کەسیگ لە ساڵ ئایندە لەیرا بمینێد.

Shafaq Live
Shafaq Live