داڵگیگ ئەرا فرووشتن
کوڵە چیرووک
کوڕیگ فرە دووس دویەتیگ دیرێد، چگە داوای، باوان دویەتە رازی بوین، تا دەزویرانیی کرد، رووژ وە رووژ فرەتر دووس ئی دویەتە تواست.
دویەتەگە فرە خوسەی لە داڵگ کوڕەگە هات، رووژ دوياي رووژ كوڕ فرەتر دووس دەزویران تواێد، و رووژ دویای رووژ دویەتەگە فرەتر خوسەی لە داڵگ کوڕەگە تیەێد.
کوڕەگە وەی کارە زانست، و تەقەلای فرەیگ دا تا ئی دویەتە کەمیگ دووس داڵگی بیاشتوود، وەلێ بیخود، خوەییش نیەتوەنێد واز لە دەزویران بارێد.
کوڕەگە هەڕەشەی دویەتە دا کە ئەگەر تەقەلایگ نەید دووس داڵگم بیاشتوێ منیش پا نەمە بان دڵ خوەم و واز لەلید تیەرم.
دویەتە وت: قەی نەیرێد، تەقەلا دەم دووس داڵگد بتوام و رەفتار خاسیگ وەردی بکەم.
کوڕەگە بڕیار دا سویر دەزویران بکەێد.
رووژ سویرەگە، کوڕەگە لە شان دەزویران نیشتیە، دەزویران فچانە گووش زاوا، و وەپی وت: داڵگد هاتیە لەلامان نیشتیە، وەپی بویش با داوەزێد، چوینکە فرە خوەشم لە ناوچارەی نیەتێد و دووسییش نەیرم.
زاوا هیز گرد، و چگ مایکریفۆن گورانیچڕ سویرەگە برد، و لەناو گشت ئامادەبویەیل وت: خوازم داڵگم بفرووشم، کی داڵگم سینێد؟
مەردم وەی کارە سەرسام بوین، و کوڕەگە سێ گلە وت: کی داڵگم سینێد؟
مەردم دەنگیان کپەو بوی، و کەسیگ هویچیگ نەوت، و داڵگیش دەس نادەو گیریە لە خوسە و شەرمی لەی کردەوەی کوڕە.
دویای گڕیگ، کوڕەگە هەڵقەی دەزویرانیی لە گیرفان دراورد، و وەشانەی روی دویەتەگە و وت: هەر خوەم داڵگم سینم، کەسیگ لەی جەهانە ئەو بڕ پویلە نەیرێد تا داڵگم بسینێد، چوینکە فرە فرە گرانە.
وەلێ بایەسە تو بفرووشم، و تەڵاق دەوزیران دا، و دەس داڵگی گرد و چگە دەیشت.
ئی قسە بویە باس مەردم، تا رووژیگ پیاییگ داد لە دەر ماڵ کوڕەگە، کە وت: م هاتمەسە داوای کوڕیگ جویر تو، ئەرا تەنیا دویەتەگەم، چوینکە زاوایگ لە تو خاستر پەیا نیەکەم.
