مەسعود بارزانی و کازمی دووپات لە گرنگی گفتوگۆ ئەرا دەرچگن لە بەسیان سیاسی کەن
شەفەق نیوز/ مەسعود بارزانی سەرۆک پارت دیموکراتی کوردستان و موستەفا کازمی سەرۆک وەزیرەیل فیدراڵی، ئمڕوو دووشەممە، دووپات لە گرنگی گفتوگۆ ئەرا دەرچگن لە بەسیان سیاسی کردن.
ئەوەیش لە دیداریگ لە شار هەولێر پایتەخت هەرێم کوردستان گردیانەو کرد، وەگورەی بەیاننامەیگ رەسیە ئاژانس شەفەق، و دیدارەگە باس رەوشەیل سیاسی وڵاتەگە وەگشتی کرد، و گرنگی پشتبەسان وە گفتوگۆ نیشتمانی ناوبەین گشت هیزەیل سیاسی ئەرا دەرچگن لە بەسیان سیاسی ک بویە کاریگەریگ لەبان رەوش گشتی، و بویە ریگریگ لە پیشکەشکردن خزمەتگوزاری ئەرا هاووڵاتیەیل، و هەڕەشەی ئارامی دەێد.
دیدارەگە دووپاتکردن لەبان رۆڵ چالاکیەیل سیاسی و کۆمەڵایەتی وەخوەی دی، ئەرا ئاسانکردن لەیەکڕەسینەوە و کەمکردن ئاست ژاوەژاو، و دویرەکەفتن لە گاڵداین، و گرنگی پەنابردن وە وتار نیشتمانی وەرپرسیار، وەخاتە عراقیگ دیموکراتی فیدراڵی ک وشەی دەستوور و یاسا لەناوی لە گشتی ئەوبان بوود.
هەردوگ لایەنەگە باس سەختیەیل ئەمنی جیاجیا، گرنگی وەردەوامی هەماهەنگی هاوبەش ناوبەین بەغداد و هەولێر کردن، ئەرا چارەکردن بڕیگ لە باوەتەیل لەنوایان دژایەتی تیرۆر، و ئەو دەسدرویژی وەردەوامە لەنان زەویەیل عراق، و عراق نەوودە هویچ شوینیگ یا پەنایگ ئەرا هەڕەشەی دەوڵەتەیل هاوسا.
