كوشيان و زەخمداری لە مرافەیگ هووزانە لەبان ماسییگ لە بەسرە
2021-07-15T09:43:54+00:00
شەفەق نیوز/ مرافەیگ هووزانە، ئمڕوو پەنجشەممە، لەناوبەین هووزەیل کەرامشە و ئال والی لە پارێزگای بەسرە قومیا.
سەرچەوەیگ ئەمنی ئەرا ئاژانس شەفەق نیوز وت: یەک کەس لەلای کەمەو کوشیا و دووان تر زەخمدار بوین لەی مرافە ک لە بازاڕ ماسی لە پارێزگای بەسرە قومیا، وتیش؛ مرافەگە لەبان ماسییگ دەس وەپیکرد.
سەرچەوەگە وتیش؛ هێزە ئەمنیەیلە چواردەور شوین رووداوەگە گردن و تەرم قوربانیەگە وەرەو پزشک دادوەری بریا، و زەخمدارەیلیش رەساننەی خەسەخانە.
و دیاری کرد ک هێزە ئەمنیەیلە ٦ کەس تا ئیسە دەسگیر کردنە ک و هیمان مینەی کەسەیلیگ تر کەن ک دەسیان لەناو مرافەگە بویە.
