ناوەندیگ یاسایی دەسنشان بەرزەوبوین سیمای گەیاکردن لە عراق کەێد
شەفەق نیوز/ وەڕیەوبەر ناوەندیگ تایبەت وە ماف مرۆڤ، ئمڕوو دووشەممە، بانگواز ئەرا داناین ستراتیژیگ نیشتمانی کرد، ئەرا چارەکردن سیمای ئەو گەیاکردن رخبەرە کرد، لەسای هەسی ٤ مەلیۆن بیکار، ودیاری کرد ک ئی سیما رەنگدانەوەی سیاسی وئابووری وکۆمەڵایەتی دیرێد، وهاتێ لەلایەن هەواڵی ناودەوڵەتی ئەرا شیوانن شیوەی کۆمەڵگا وەکار هاوریاگە.
حازم ردێنی وەڕیەوبەر ناوەندەگە لە بەیاننامیگ رەسیە ئاژانس شەفەق نیوز هوشداری لە بەرزەوبوین سیمای گەیاکردن لەسای هەسی ٤ مەلیۆن بیکار و گرانی خوەراک دا.
ردێنی ئەی سیما وە ئەنجامیگ سرووشتی ئەرا نەداری و بیکاری و بەشەوکردن نا یەکسانی ئەرا داهاتەیل و بڕیارەیل هەڕمەکی دانا، وتیش: ئی سیما زیایەو بوی هەرچەن یاسایل سەختیگ لەبان گەیاکردن لە عراق هەس، باوجی بڕەیل گەیاکەرەیل لە عراقی وبیگانە لە پاکستان یا هیندستان یا بەنگلادیش رووژ لەدویای رووژ زیایەو بوود.
ردێنی وتیش: ئی سیما لە بازاڕەیل ونزیک نوڕینگەیل پزشکی ولە دوڕیانەیل و ناو شارەیل وپەرستاگەیل بڵاو بویە، ک خیزانەیلیگ هەس گشتیان وە دەسپیچگەیل جیاجیا ئەرا دڵشکانن خەڵکەگە گەیا کەن.
هەمیش وت: سیمای گەیاکردن رەنگدانەوەی سیاسی وئابووری وکۆمەڵایەتی دیرێد، دویای ئەوەگ کردەوەیلیگ لەشوینی دەرکەفت جویر بازرگانیکردن وە ئایەم هووشبەری، و شایەت لەلایەن هەواڵگری ناودەوڵەتی وەکاریان بارن ئەرا بەدکردن شیوەی کۆمەڵگا، ک ئی سیما تەنیا لەبان عراقیەیل نەمەن، باوجی بویە کار بیگانەیل.
وەڕیەوبەر ناوەندەگە دیاری کرد ک بەشیگ هەس ژنەیل ژیر تەمەن یاسایی ومناڵ کوورپە لەی کارە لەلایەن باندەیل وەکار تیارن، ک داوای داناین ستراتیژیگ نیشتمانی کەێد ئەرا چارەکردن ئی سیمای رخبەرە، چوینکە هەڵمەتەیل ئەمنی، وگیرهاوردنیان ئەرا چەن رووژیگ ئی سیما لەناو نەورد.
ردێنی داوای گورجکردن ماڵەیل ئەرا داکاسیان گەیاکەرەیل کرد، چوینکە ئەرا دووارە ئامادەکردنیان ئەرا ناو کۆمەڵگا گرنگە تا هووکارەیان وەکارکردن بکریەێد، وهەمیش بایەتە تەقەلایل حکومەتی و کەرت تایبەت وەیەکەو بچنیەن، تا گیچەڵ بیکاری چارە بکەێد و پاڵپشتیکردن پڕۆژەیل تایبەت جیوەجی بکریەێد ک کار ئەرا گەنجەیل بیکار پەیا بوود، ک لەناوداین گەیاکردن وە خاسکردن رەوش ئابووری گشتی کریەێد.
