بنووڕ.. "ستوینەیل پەیابوین" وە کامیرای جەیمس ویب
شەفەق نیوز/ رەوانگەی "جەیمس ویب" لە ئاژانس بۆشایی ئاسمان ئەمریکی "ناسا" توەنست کرتەی نوویگ بگرێد ئەرا ئەوەگ وە "ستوینەیل پەیابوین" ناسریاگە، ک هەڵم گاز و تووز و ئەسارەس.
وینەگە ستوینەیلیگ لە گاز و تووز لە دەور بڕیگ لە ئەسارەی بریقەدار نشان دا ک هەژمار نیەکریەن.
یەکەم جار لە ساڵ ١٩٩٥ ئی سیمای گەردوونیە توومار کریا، ئیجا لە ساڵ ٢٠١٤، ئەوەیش وە تەلیسکۆب "هابڵ"، باوجی وینە نووەیلە هویرد ورەنگینترن.
وە توانای ئی تەلیسکۆب نووە، ستوینەیل پەیابوین جویر جارانی تاریک نییە.
ستوینەیل پەیابوین ٨ هەزار ساڵ رووشنایی لە زەوی دویرە.
ئی وینەیلە ئەوەسا دەسمیەتی زانایل گەردوون دەن ئەرا هەژمارکردنیگ هویردتر ئەرا ئەو ئەسارەیلە ک لە نوو پەیا کریانە، وەگەرد بڕ ئەو گاز و تووزە لەو ناوە.
گاز و تووزەگە لەبان یەک کەڵەکە بوینە، و بڕیگ ئەسارە دیارە ک وە تووز پووشیانە.
تیم رەوانگەی جەیمس ویب وەشانازی وت: ئی وینە نووە ئەوەسا دەسمیەتییان دەێد تا بزانن چوین ئەسارە دروس بوود، وەگورەی رووژنامەی دەیلی مەیل بەریتانی.
تیمەگە پەنا وە کامیرای نزیک لە تیشک ژیر سوور برد، ک توەنێد رووشنای لە کۆنەترین ئەسارە و گەلە ئەسارەیل بارێد.
تەلیسکۆبەگە پشت وە بڕ فراوانیگ لە تیشک ژیر سوور بەسا ئەرا نووڕین سەردەم گوزەشتە، ئەوەیش وە شیەوکردن ئەو ماوە ک رەسین رووشناییەگە وەپی چگە.
جەیمس ویب کڕەیل قەمچداریگ لە کنار بەشیگ لە ستوینەیل نشان دا، ک لەورا ئەسارەیلیگ لەناو تووز و هەڵمەگە دیرن دروس بوون.
