هەڵەبجە...خوەیوەخشەیل کەرت تەندروسی داوای دامەزریان کەن
2022-09-04T08:35:05+00:00
شەفەق نیوز/ خوەیوەخشەیل و دەرچگەیل تەندروسی دانەمەزریاگ لە هەڵەبجە ئمڕوو یەکشەممە، خوەینیشاندانیگ سازدان لەنوای وەریەوبەرایەتی تەندروسی پارێزگاگە ئەرا داواکاری دامەزراننیان.
ئارام عەلی یەکیگە لە خوەیوەخشەیل کەرت تەندروسی وە پەیامنێر ئاژانس شەفەق نیوز وت، دەیان خوەیبەخش لە کەرت تەندروسی شەوەکی ئمڕوو یەکشەممە ٤ ئەیلول گردەوبوین لە هەڵەبجە ئەرا داواکاری دامەزراننیان.
وتیش، گشت خوەینیشاندەرەیل جویر خوەیوەخش کار کەن لە فەرمانگەیل حکومی و خەسخانەیل ئەرا ماوەی چەن ساڵیگە باوجی بیبەشکریانە لە دامەزرانن.
لەو مەوقە پەیامنێر ئاژانس شەفەق نیوز راگەیان، هیزەیل ئەمنی لە هەڵەبجە قەیەغەی رووژنامەنووسەیل کردنە لە روماڵکردن راگەیانن خوەینیشاندانەگە.
