پارێزگایگ لە هەرێم کوردستان لەوەر کۆرۆنا زەنگ مەترسی کوتێد

شەفەق نیوز/ دکتۆر جیهاد ئیبڕاهیم وەرپرس تیم دژوە کۆڕۆنا لە پارێزگای هەڵەبجە، ئمڕوو جمعە، راگەیان بەرزەوبوین ژمارەی تووشهاتنەگان وە پەتاگە لە سای نەوین بوودجەی تەرخانکریاگ ئەرا پەتاگە لە پارێزگاگە. دکتۆر ئیبڕاهیم لە کۆنگرەیگ رۆژنامەوانی ئمڕوو وت: ٥٠ لەسەد لە رێژەی تاقیکردنەوەگان لە تاقێگەی پارێزگاگە ئەنجامەگانی هەڵگر ڤایڕۆسەگە بوی، ورێژەی تووشهاتنەگان لە هەڵەبجە هالە بەرزەوبوین وەردەوامیگ، ودیاریکرد ک تەنیا سێ لە کادرە تەندروسیەگان هانە تاقێگەگە، وژمارەی گەورایگ دیریمن لەوانەگ خوازن بکەفنە وەر تاقیکردن، و توانای تاقێگە تەنیا ئەرا ٣٠٠ تاقیکردنەوە مەنیە. وتیش؛ هەر تووشهاتەیگ وەکارهاوردن پلازما بخوازێد بایەسە ئەرا سلێمانی رەوانە بکریەێد، وئەیە گیچەڵ گەورایگە، وئاماژەدا ک داواکارییگ ئەرا وەزیرە دارایی و ئابووری، و وەزیر تەندروسی لە هەریم کوردستان ئاڕاستە کریاگە، ئەرا تەرخانکردن بووجەی تایبەتیگ وە پلازمای خوین بەڵکم هیچ وەڵامیگ وەرنەگردیمن. دکتۆر ئیبڕاهیم ئاماژەدا ک خوەیان تەنیا توانای وەرگردن پەنج تووشهاتگ نوو وەڤایڕۆسەگە دیرن، و ئیمە دڵنیا نییمن ک سوو بتوێنیمن چارەسەری ٣٥ تووشهاتگ لە خەسەخانەگە بکەێمن، وداوا لە حکومەت هەرێم کوردستان کرد رزگار پارێزگای هەڵەبجە بکەێد، ودابین پێداویستیە پزشکیەگان بکەن لەسای بەرزەوبوین ژمارەی تووشهاتنەگان وە پەتاگە. هەمیش وت: ئەگەر حکومەت وەفریامان نەکەفت، خو ئیمە توانای وەردەوامی لە کارمان نێەمینێد، و ئەوسا دەس لەکار کیشیمنەو، وئەرا خەڵک پارێزگاگە وت: توانامان کەمە.