تەندروسی جهانی: پەتای کۆرۆنا مەترسیدارترین حاڵەتەیل فریاکەفتنە و بڵاوبوینەگە دووقاتەو بوی
شەفەق نیوز/ رێکخراو تەندروسی جهانی، ئمڕوو دووشەممە، راگەیان ک پەتای ڤایڕۆس کۆڕۆنا جوور مەترسیدارترین حاڵەتیگ دانەێد لە ئاست جهان، و ئاماژەدا ک بڵاوبین پەتاگە هالە خێرابوین.
تیدرۆس ئەدهنۆم گیبریسوس وەڕیەوبەر گشتی رێکخراوەگە لە کۆنگرەی رۆژنامەوانی وت: دیارە ک پەتای ڤایڕۆس کۆرۆنا مەترسیدارترین حاڵەت فریاکەفتنە لە هەر وەختیگ گوزەیشتە راگیانیمنە.
گیبریسوس ئاماژەدا ک رێکخراو تەندروسی جهانی راپۆرتەیلیگ وەرگرد وە دەور ١٦ مەلیۆن تووشهاتن وە ڤایڕۆسەگە، و زیاتر لە ٦٤٠ هەزار مردن، و دووپاتکرد؛ پەتاگە لە خێرایی وەردەوامە.
وەڕیەوبەر رێکخراوەگە جەختکرد ک ٦ هەفتەی دویایین دووقاتی تووشهاتنەگان وە نزیکەی دووجار وەخوەی دی.
گیبریسوس وتیش؛ سەرکەفتن لەبان ڤایڕۆسەگە ئەنجام نێدریەێد مەگەر تەنیا لە ری وەجیهاوردن سەختیگ لە ریکارە مقەیەتی و تەندروسیەگان، هەر لە وەکارهاوردن دەمامەک تا رەسێدە دویرەو کەفتن لە قەرەباڵغی مەردم، و دیاری کرد؛ لەو شوونەیلەگ لەناویان پابەندی هەس وەی ریکارەیلە تووشهاتنەگان کەومەو بوود، ولەو شوونەیلەگ جیوەجی نێکریەێد تووشهاتنەگان بەرزەو بوون.
وەڕیەوبەر گشتی رێکخراوەگە ئاماژەدا وەو ریکارەیلە ک حکومەتەیل کەنەدا و چین و ئەڵمانیا و کۆریای باشووری وەکاری هاوردن، ک توێنستن کۆنتڕۆڵ بڵاوبوینەگە بکەن.
