لە کۆبونەوەی حکومەت هەرێم کوردستان.. بارزانی ئومید وە رێککەفتن هاوسەنگیگ وەل بەغداد دیرێد
شەفەق نیوز/ ئەنجومەن وەزیران هەرێم کوردستان، ئمڕوو چوارشەممە، دانیشتنه ئاساییەگەی بەسا وەسەرۆکایەتی مەسرور بارزانی سەرۆک ئەنجومەن وەزیران، وهاوبەشی قوباد تاڵەبانی جیگری ، ئەویش لە بازنەیگ تەلەفزیۆنی داخریاگیگ وەسیستم ''ڤیدیۆ کۆنفڕانس''.
حکومەت هەرێم لە بەیاننامەیگ رەسیە ئاژانس شەفەق نیوز وت: بارزانی لە سەرەتای کۆبونەوەگە باس کەشوهەوا خاسەگان کرد و لەیەکڕەسینەوەگان لەناونی لایەنە سیاسیەگان لەهەرێم کوردستان ئەرا کۆتایی هاوردن وە ناکۆکیە ناوخۆیەگان، و هەمیش لەجیای ئەنجومەن وەزیران تاریف ئی گفتوگۆەیل و چەوپیکەفتنەیلە کرد جوور گام گرنگیگ ئەرا یەکێتی ریزەگان و زیایکردن لە پشتگیری ئەرا حکومەت هەرێم کوردستان.
دویای ئەوە سەرۆک ئەنجومەن وەزیران ئاماژەدا وەگرنگی ئامادەبوین وەزیرەیل حکومەت ئەرا دانیشتنه‌یل میوانیکردنەگان لەلایەن ئەندامەیل پەرلەمان، هەمیش سەرۆک ئەنجومەن وەزیران هەماهەنگی وکارکردن وە هەست یەک تیمی لە کابینەی حکومەت هەرێم کوردستان ئەرزشدار ناوبرد.
وەزیرە پەیوەندیدارەگان هەرکە وە پسپۆری خوەی، وەڵام پرسیارەیل ئەندام پەلەمانەگان لە دانیشتنەگان ٢٧ و ٢٨ لەی مانگە دانەو، لەچەن باوەتیگ بوی لەلیان رەوش ناوچە کوردستانیەگان لە دەیشت ئیدارەی هەرێم، وریکارەیل دژایەتی ڤایڕۆس کۆرۆنا، و رەوش دارایی و ئابووریەگە لە هەرێم، و دویاترین نووەوبویەگان لە دانووستانەگان وەگەرد حکومەت فیدڕاڵی.
لەکۆبونەوەگە سەرۆک ئەنجومەن وەزیران رووشنای خستە بان دویاترین گوڕیانه‌یل له گفتوگۆەیل ناوبەین حکومەت کوردستان و حکومەت فیدڕاڵی، و ئاماژەدا ک خوەی وەردەوامە، و حکومەت هەرێم دووارە ئامادەیی خوەی نشان دەێد ئەرا ئەنجامداین پابەندیە دەستوریەگانی وەرانوەر دابینکردن ماف و شایستە دەستوریەگان هەرێم، وەتایبەت ک ژمارەیگ پێشنیار هەس ئەرا رێککەفتن.
سەرۆک ئەنجومەن وەزیران دووپاتکرد: ئومیدخوازیمن لە نزیکترین دەرفەت و لە دویای جەژن ئەو دانوستانەیلە رێکەفتنیگ هاوسەنگانە لەلیان بوودەو چەودیری لە بەرژەوەنی هەردوگلا بکەێد.
ئەنجومەن وەزیران جەختکرد لە گرنگی وەردەوامبوین پلانە ئەمنیەگان ئەرا وەپشتسەرنان قەیرانە ئابووریەگە، وەگەرد جەختکردن ئەرا دابین کردن شایستە داراییەگان و مووچەگان ک خوەی لەلای حکومەت کاریگ سەرەکیە.
لە کۆتایی کۆبونەوەگە، ئەنجومەن وەزیران باس ریکارە مقەیەتیەگان و رینما تەندروسیەگان لە باوەت ڤایڕۆس کۆڕۆنا کردن وە تایبەت لە رووژەیل جەژن قوربان، ولەرووشنایی ئەوە ئەنجومەن وەزیران رینما داگە ژوورەیل ئۆپراسیۆنەگان وە ریکارە گونجیایەگان ئەرا سەڵامەتی هاووڵاتیەیل.
