شاندیگ حکومەتی و یەکیگ سیاسی لە هەرێم ئەرا هەفتەی ئایندە سەردان بەغداد کەن
شەفەق نیوز/ بڕیارە دوو شاند پایەبەرز لە هەرێم کوردستان یەکیگیان حکومەتیە و ئەواکە سیاسییە، لە هەفتەی ئایندە سەردان بەغداد پایتەخت بکەن، ئەرا باسکردن دەربارەی چەسپانن بەش هەرێم لە بوودجەی دارایی فیدڕاڵی ئەرا ساڵ ٢٠٢١.
دارا رەشید وەزیر پلانسازی، ئمڕوو، لە وتاریگ ئەرا رووژنامەنووسەیل لە هەولێر و پەیامنێر ئاژانس شەفەق نیوز لەناویان بوی وت: شاندە حکومەتیەگە لە یەکشەممەی ئایندە روی کەێدە بەغداد، و لە پشتی شاندیگ سیاسی پایەبەرزیگ.
و دیاری کرد ک وەرجەیە بڕیار بوی شاندە سیاسیەگە وە سەرپەرشتیاری نێچیرڤان بارزانی سەرۆک هەرێم کوردستان بوود و وەناونشان جیگر سەرۆک پارت دیموکرات کوردستان و هەمیش سەرکردەیگ لە یەکێتی نیشتمانی کوردستان و هەمیش لە بزووتنەوەی گۆڕان و ئەو حزبەگان ئەگەر ئارەزوو بەشداربوین داشتن.
وتیش: ئومید خوازیمن وەگەرد حکومەت فیدڕاڵی بڕەسیمنە ریککەفتن لەبان ئەوە ک رووژانە ٢٥٠ هەزار بەرمیل نەفت وەپیان بیەیمن وەگەرد ٥٠٪ لە داهاتە ناوخۆییەگان و مەرزەگان، و ئەگەر نەڕەسیمنە رێککەفتن، ئەوەسا پشت وە داهاتە ناوخۆییەگانمان بەسیمن، و خەیمنەی بان یاسای بوودجەی هەرێم.
دەربارەی پڕۆژەی بوودجەی هەرێم، وەزیرەگە وت: حکومەت هەرێم خاس زانێد ک خەرجەیل دەرکردن نەفتەگە بەرزن، ئەراوە حکومەت دووارەگوزاریی کەێد و تەقەلای کەمەوکردن لە خەرجەیل دەرکردن نەفتەگە دەێد.
وهەمیش وت: ئەگەر گردەوکردن داهاتە ناوخۆییەگان ئاشکرایی بوود، ئەو وەختە هاووڵاتییەگە رەسێدە بڕوایی تەواویگ ک توانایل حکومەت هیلن بەشیگ لە مووچەگەی بووڕید.
