کەربەلا وەفەرمی مکیس سرۆک هەرێم کەێد ئەرا سەردانی
شەفەق نیوز/ حکومەت خۆجێیی لە پارێزگای کەربەلا، ئمڕوو پەنجشەممە، مکیسیگ فەرمی ئاڕاستەی نێچیرڤان بارزانی سەرۆک هەرێم کوردستان کرد ئەرا سەردان پارێزگاگە.
بارزانی، ئمڕوو، لە دیوان سەرۆکایەتی هەرێم لە پارێزگای هەولێر پایتەخت هەرێم کوردستان پێشوازی لە نسەیف جاسم پارێزکار کەربەلا کرد.
بەیاننامەیگ لە سەرۆکایەتی رەسیە ئاژانس شەفەق نیوز وت: لە چەوپیکەفتنەگە پارێزگار کەربەلا باسکرد لە بەشیگ لە رەوشەیل پارێزگاگە، وەتایبەت لە باوەت گەشتیاری ئاینی ، و ئاماژە کرد ک ئاسایش و ئارامی کەربەلا زەمینەسازی کەێد ئەرا وەبەرهەمهاوردن ناوخۆیی وبیگانەیی، ک پارێزگاگە رەوشیگ لە فراوانکردن وەردەوامیگ وەخوەی دوینێد، وهەمیش دەسخوەشی لە ئەزموون سەرکەفتگ کەرت تایبەت لە هەرێم کوردستان کرد، لە چین بەرهەمهاوردن ک هیلێد کەربەلا و ئەو پارێزکایل عراق لەلی سوود بگرن.
لە لایبگ تر لە چەوپیکەفتنەگە، باسکریا لە هاوکاری لەناوبەین پارێزگا فیدرالیەگان، وزیایدکردن دەزوازی دەسەڵات پارێزگاگان تا بتوێەنن خزمەتگوزاری زیاتر پێشکەش بکەنە هاووڵاتیەگان و زویتر کار وپڕوژەیلیان جیوەجی بکەن.
لە کۆتایی چەوپیکەفتنەگە، نێچیرڤان بارزانی سەرۆک هەرێم رەزامەنی وە مکیس پارێزگار کەربەلا بوی ئەرا سەردان پارێزگاگە و ئومێد خوازی ک لە وەختیگ گونجیاگ لە ئایندە سەردان کەربەلا بکەێد.
