حکومەت هەرێم ئاشکرای ووردەکاری کۆبنەوەگەی کازمی وەل بارزانی کەێد
شەفەق نیوز/ حکومەت هەرێم کوردستان ئاشکرای ئەوگ لەکۆبونەوەگە بوی لەناوبەین موستەفا کازمی سەرۆک وەزیرەیل کرد وگەرد مەسرور بارزانی سەرۆک حکومەت هەرێم.
بەیاننامەیگ ئەرا حکومەت هەرێم لەزوان بارزانی باس لە خوەشحاڵیی کرد وە سەردانەگەی سەرۆک وەزیران فیدڕاڵی، وداناگەی وە نشانەی خاسیگ وەرەو چارەسەرکردن گرفتە گیرهاتگەگان لەناوبەین هەرێم کوردستان و حکومەت فیدڕاڵی.
سەرۆک وەزیران هەرێم کوردستان جەختکرد ک گرفتە گیرهاتگەگان لەناوبەین هەرێم وحکومەت، تەنیا لەبان مووچە وبەش بوودجە نیە، و باس لە ئومید خوەی کرد لە رەسین هەردوگلاگە ئەرا یەکلاکردنەوەی گشت گرفتە گیرهاتگەگان لە ئایندەی نزیک، وەشیوەیگ ریشەیی، ولەبنەمای دستور.
سەرۆک وەزیران هەرێم وت؛ مووچەی فەرمانبەرەگان ماف یەکسانیە، چ لە هەرێم بوون یا لەهەر بەشیگ لە عراق، وبایەدە تیکڵای ناکۆکیە سیاسیەگان نەکریەێد.
وئاماژەکرد لە گرنگی یەکلاکردن ناکۆکیەگان لەباوەت بوودجە ونەفت وناوچە کوردستانیەگان لە دەیشت ئیدارەی هەرێم ئەرا پێشمەرگە، وباس کرد لە گرنگی گورجکردن میکانیزم هەماهەنگی ئەمنی هاوبەش لەناونی پێشمەرگە وسوپای عراق لەناوچە کوردستانیەگان لە دەیشت ئیدارەی هەرێم ئەرا نواگردن لە هەڕەشەگان داعش.
هەرلیوا؛ سەرۆک وەزیرەیل فیدڕاڵی ئاماژەکرد ک سەردانەگەی ئەرا هەرێم کوردستان وەیاوەری شاند گەورا وگرنگیگ، بەڵگەی وەهێزیگە لە ئامادەبوینمان ئەرا چارەسەرکردن گشت گرفتە گیرهاتگەگان و داناین بنەمایل نوو و وەهێزیگ ئەرا پەیوەندیەگان لەبنەمای هاوکاری و لەیەک رەسینەوەی هاوبەشیگ لەناوبەین هەردوگلا.
سەرۆک وەزیرەیل فیدڕاڵی دووپاتکرد ک سەرکەفتن هەر بەشیگ لە عراق، خوەی سەرکەفتن گشت وڵاتەگەس، وتیش؛ گەشبینم ک ئیمە توێنیمن نوای گشت سەختیەگان بگریمن وەهاوکاری هەماهەنگی لەناوبەین گشت پێکهاتەیل گەل عراق، وئیسە دەرفەتیگ هەس ورەسینەوەیگ خاسیگ ئەرا چارەسەرکردن گشت گرفتە گیرهاتگەگان.
