عراق وەرەو کارەساتیگ راسی چوود رەسێدە ٤٠ لە سەد لە خەڵکەگەی
شەفەق نیوز/ یەکێتی کۆمەڵەی کشاوەرزی، ئمڕوو سێشەممە، دووپات کرد ک کەم ئاوه وە شیوەی گەورەیگ کاریگەری لەبان بەرهەمەیل کشتوکاڵی کردیە، و لەبان پلان کشتوکاڵی وەشیوەی گشتی، وتیش: مەزەنەی کارەساتیگ لە ماوەی بانان کریەێد، داوا لە حکومەت کرد دەسبکەێدە دانوسەنین وەرد دەوڵەتەیل هاوسا تا بەش ئاو عراق مەرەقەز بکەن.
حەسەن تمیمی سەرۆک یەکێتیەگە ئەرا ئاژانس شەفەق نیوز وت: پلان کشتوکاڵی ئمساڵ وە شیوەی گەورەیگ زیان وەخوەی دوینێد، چوینکە وەزارەت سامانەیل ئاەی بەش تەواوی کشاوەرزەیل لە ئاوەگە نەیا، لەوەر کەم ئاوی لە چەمەیل دیجلە و فورات ک ئیران هەیشت چەم لە عراق بڕیە، و لە خود وەختەگە تورکیا بەش عراق لە چەمەیل دیجلە و فورات نیەێد، ک بویە کاریگەری بەدیگ لەبان بەرهەمەیل کشتوکاڵی.
تمیمی وتیش: ئەراوە دوینێ فرەی زەویەیل عراق بوینەسە سەنگ و ئەگەر ئی وەرزیشە واران نەوارێد، بوودە کارەساتیگ راسی لە کشتوکاڵی، و زەرەد گەورەیگ ئەرا چین کشاوەرز و جفتیارەیل لە گشت پارێزگایەیل عراق.
تمیمی هوشداری لە ئەگەر کووچبردن گەورەیگ کرد لە ئاوای وەرەو شار، و دیاری کرد ک ئی کووچبردنە بوودە کارەسات و زوور گەورەیگ لەبان شارەیل، ک خوەیان زیان لە پڕکیان وکەمی خزمەتگوزاری و قەیران نیشتەجیبوین وەخودیان دوینن، و یەیشە بوود ئەگەر حکومەت دەس نەکەێدە دانوسەنین وەرد دەوڵەتەیل هاوسا.
وتیش: ئەرایە بایەتە گشتی، وە سەرۆک فراکسیۆنەیلیش، ململانەیان بخەنە کنار، و نەکفنە شوین ململانەیان ئەرا پۆست وپلە، واز لە کشاوەرز عراقی لەی گیچەڵە نارن، ک ئەوەسا فرە لە خیزانەیلیان لەناو دەێد، ک گشتی زانێد ک لە ٣٥ تا ٤٠ لە سەد لە خەڵک عراق جەفتیار و کشاوەرزە.
تمیمی لە کوتایی قسەیلی وت" پشتبەسان وە پتڕۆڵ هویچ سوودیگ ئەرا ئی کۆمەلگا نەیرێد ک فرەیان کۆمەڵگای کشاوەرزە، ئەراوە داوا لە موستەفا کازمی سەرۆک وەزیرەیل کەیمن، خوەی دەسبەێدە وەر و تیمیگ ئەرا دانوسەنین وەرد دەوڵەتەیل هاوسا بوەێد تا بەش ئاو عراق لە تورکیا و ئیران مەزەقەز بکەن.
