کشتوکاڵی کوردستان ئاشکرای هووکارەیل قەیران ئاو کەێد و ئامادەکاری ئەرا بێناکردن چوار بەنداو نوو
شەفەق نیوز/ وەزارەت کشتوکاڵی لە حکومەت هەرێم کوردستان، ئمڕوو دووشەممە، ئاشکرای هووکارەیل قەیران ئاو و کەمەوبوین ئەمار ئاوەگە لە هەرێم کوردستان کرد، وتیش: حکومەت هەرێم کوردستان ئامادەکاری ئەرا بیناکردن ٤ بەنداو نوو کەێد.
رزگار حەمە خدر جینشین وەزارەت کشتوکاڵی لە حکومەت هەرێم کوردستان ئەرا ئاژانس شەفەق نیوز وت: لەماوەی دوو ساڵ گوزەشتە ئاڵشتبوین کەشوهەوا کاریگەری لەبان گشت ناوچەیل جەهان داشت، وەتایبەت ناوچەیل خوەرهەڵات ناوڕاس، و عراق و هەرێم کوردستان وەدیاریکریاگ، ک هیشت واران کەمەو بوود، تایبەت لەو ناوچەیلە ک واران سەرچەوەی ئاویانە.
وتیش: هەرچەن عراق خاوەن گەورەترین بەنداوەیلە لە ناوچەگە جویر بەنداو مووسڵ، باوجی لەو ماوەی گوزەشتە ئاویگ وەگورەی خوازین لەناوی گردەو نەوی.
لەباوەت هووکارەیل کەم ئاوی لە عراق و هەرێم کوردستان، جینشین وەزارەت کشتوکاڵی دووپات کرد ک زیایبوین شمارەی دانشتگەیل و کەمی رووبەر سەوز و نشانەیل بیاوانی و ئاڵشتبوین کەشوهەوا و کەم وەکارهاوردن تەکنەلۆژیا لە وەکارهاوردن ئاو ژیرزەوی و گرفتەیل دارایی وزیایچگن لەبان سەرچەوەیل ئاو لەلایەن هاووڵاتییەیل وە کەنین بیر و کەم هوشیاری لە کەم وەکارهاوردن ئاو و دابین نەکردن پویل ئەرا دروسکردن بەنداوەیل، یە گشتی هوکارەیل راسییگ بوین ئەرا کەم ئاوی.
رزگار حمه خدر دیاری کرد ک وەگورەی راپۆرتەیل وەزارەت سامانەیل ئاوی عراق، عراق پەنجەمین دەوڵەتە ک رەخبەرترینە لە جەهان لە نشانەیل بیاوانی.
لەباوەت رەوش ئاوی لە هەرێم کوردستان، خدر دیاری کرد ک لەبان ئەو تەقەلایل فرە لەلایەن حکومەت هەرێم کوردستان ئەرا نواگردن قەیرانەگە لەڕی تەرخانکردن بوودجەیگ دارایی ئەرا دروسکردن ٨ بەنداو، نزیکەی ٨٠% لەلیان تا ئیسە تەواو بویە، و ئامادەکاری ئەرا دروسکردن چوار بەنداوتر هەس، وەگەرد گوڵەمەیل ئاو ئەرا زیایکردن ئاو ژیرزەوی، هەمیش هەرچەن سەرچەوەیل هەمەڕەنگیگ ئەرا ئاو لە هەرێم هەس، باوجی هەرێم کوردستان زیان لە بەد وەڕیەوبردن سامانەیل ئاوی وەخوەی دوینێد.
لەباوەت چارەسەریەیل، جینشین وەزارەت کشتوکاڵی وت: بایەتە گامەیل سیاسی وحکومەتی نوویگ بوود ئەرا چارەکردن قەیرانەگە، و گرنگی وەی باوەتە بیریەێد چوینکە ئاو ئەرا ژیان ئایم وئاژەڵ و درەخت گرنگە، و هەمیش لە پیشەسازی و بازرگانی گرنگە، هەمیش بایەتە پرۆتۆکۆلی بوود ئەرا وەکارهاوردن ئاو، و رێککەفتنیش وەرد دەوڵەتەیل هاوسا ئەرا داناین میکانیزمیگ ئەرا رەفتارکردن دارایی وەگورەی میکانزم خاس هاوسایەتی و رێککەفتنەیل ئاو.
