زەخمداری دوو سەرباز عراقی وە تەقیان بومبیگ دانریاگ لە دیالە

شەفەق نیوز/ سەرچەوەیگ ئەمنی، ئمڕوو دووشەممە، خەوەردا لە زەخمداری دوو سەرباز لە سوپای عراق، لە ئۆپراسیۆنیگ ک تا ئیسە وەردەوامە، ئەوەیش وە تەقیان بومبیگ دانریاگ لە پارێزگای دیالە.

سەرچەوەگە ئەرا ئاژانس شەفەق نیوز وت: بومبەگە شەوەکی ئمڕوو تەقیە بان دەوریەیگ سوپا لە فیرقەی یەکەم لە ناوچەی سەفرە باکوور ناحیەی عزێم مەوقەی ئۆپراسیۆن وەشکین.

سەرچەوەگە دیاری کرد ک کەرتەیل فیرقەی پیادەی یەکەم دەسکردنە جیوەجیکردن فەرمان ئۆپراسیۆن (ئێرادە سولبە) ئەرا پاکەوکردن حاوی عزێم وەپاڵپشتی ئۆپراسیۆنەیل سەڵاحەدین و کەرکوک ئەرا سێیەم رووژە، وتیش: ئۆپراسیۆنەیل دیالەیش لە پاکەوکردن ئاوایەیل وئارامی کەرت وەرپرسایەتی هەرلە خاڵ سەفرە تا نارین بەشدارە.