داوەزیان پلەی گەرمی و واران.. کەشوهەوای عراق لەی رووژەیل بانانە
2023-11-11T09:32:50+00:00
شەفەق نیوز/ دەسەی کەشناسی عراق، ئمڕوو شەممە، کەشوهەوای وڵاتەگە لەی رووژەیل بانانە بڵاو کرد، و باس واران و ئەور و تریشقە و داوەزیان پلەی گەرمی کرد.
دەسەگە لە بەیاننامەیگ رەسیە ئاژانس شەفەق نیوز وت: سوو یەکشەممە، کەشوهەوا لە گشت وڵاتەگە نیمچە ئەورە، و پلەی گەرمی جویر خوەی مینێد.
وتیش: رووژ دووشەممە، لە ناوچەی ناوڕاس و باشوور ئەورە تا ئەور تەواوە، و لە ناوچەی باکوور ئەورە وەگەرد دەرفەت واران سووکیگ، و پلەی گەرمی لە بەشەیل باکوور و ناوڕاس کەمیگ نزمەو بوود، و لە ناوچەی باشوور نزیک رووژ وەرجە خوەیە.
دیاری کرد کە رووژ سێشەممەر ئاسمان لە بەشەیلیگ ناوچەیل ناوڕاس و باشوور ئەورە، وەگەرد دەرفەت واران و تریشقە، و لە ناوچەی باکوور ئەورە وەگەرد واران و گرمەهڕ، و پلەی گەرمی لە گشت وڵاتەگە جویر خوەی مینێد.
دەسەگە وتیش: کەشوهەوای رووژ چوارشەممەی ئایندە، لە گشت وڵاتەگە ئەورە وەگەرد پرشە وارانیگ وەرد گرمەهڕ، و گەرمیەگە چەن پلەیگ نزمەو بوود.
