ئاێا ئەیلوول هوونکی ئەرا عراق تیارێد؟
شەفەق نیوز/ دەزگای کەشناسی عراق، ئمڕوو پەنجشەممە، کەشوهەوای رووژەیل بانان لە وڵاتەگە راگەیان، و مەزەنەی داوەزین پلەی گەرمی هەرلە رووژ یەکشەممەو کرد.
دەزگاگە لە بەیاننامەیگ رەسیە ئاژانس شەفەق نیوز وت: کەشوهەوای وڵاتەگە ئەرا سوو جمعە کەمیگ ئەور لەناوی بوود، و پلەی گەرمی کەمیگ لەناوچەی ناوڕاس لە ئمڕوو زیاتر بوود، و لە ناوچەیل باکوور و باشوور وڵاتەگە نزیک پلەی ئمڕوو بوود.
بەیاننامەگە وتیش: کەشوهەوای رووژ شەممە، لە ناوچەیل ناوڕاس و باشوور رووشن بوود، و لە ناوچەی باکوور رووشن تا نیمچە ئەور بوود، و پلەی گەرمی لە گشت وڵاتەگە جویر رووژیگ وەرجەخوەی بوود.
دیاری کرد ک رووژ یەکشەممە رووشن بوود، و پلەی گەرمی کەمیگ لە رووژ وەرینی لە بەشەیل ناوڕاس و باکوور کەمترەو بوود، و لە بەش باشوور وڵاتەگە نزیک لە رووژ وەرینی بوود.
بەیاننامەگە وتیش: کەشوهەوای رووژ دووشەممەی ئایندە رووشن بوود، و پلەی گەرمی بوودە نزیک رووژ وەرینی لە بەشەیل ناوڕاس و باشوور وڵاتەگە، و لە بەش باکووری کەمیگ داوەزێد.
