پەیاکردن دەیان پارچەی ئاسەواری لە پارێزگایگ لە عراق

شەفەق نیوز/ وشکینەر ئاسەوار پارێزگای دیالە ئمڕوو سێشەممە ئاشکەرا کرد 141 پارچە ئاسەواری لە شارەیل بەعقوبە و موقدادیە پەیا کریایە. 

وەڕێەوبەر فەرمانگەگە ئەحمەد عەبدولجەبار خەماس وە ئاژانس شەفەق نیوز وت، تیمیگ لە لێکۆڵینەوە و هەڵکەنین و مینەکردن سەر وە وشکین ئاسەوار توەنستنە 91 پارچە ئاسەواری لە ناوچەی 27 گاتون خوەرئاوای قەزای بەعقوبە پەیا بکەن چوودەو ئەرا سەردەم سلوقی و فارسەیل. 

وتیش؛ پارچە ئاسەوارەیل لە گردیگ شۊنەواری پەیاکریانە لەماوەی کارکردن مەیدانی ئەرا پرۆژەی نیشتەجیبۊن لە ناوچەی گاتون خوەرئاوای بەعقوبە. 

خەماس ئاشکەرا کرد، پارچە شۊنەواریەکان بریتین لە کۊز و چراخ و گوڵدان لە شیوە و قەوارەیل جیاواز وەیلکان و سکەی زیو و وەیلکانەیل جیاواز. 

خەماس راگەیان 50 پارچە ئاسەواری لە ناوچەی زندان ئاسەواری پەیاکردنە لە قەزای موقدادیە ک بریتین لە کۊز و چراخ و وەیلکان سەردەم ساسانی وسەردەمەیل ئسلامیەیلتر. 

پارێزگای دیالە زیاتر لە 800 شۊنەوار دیرێد لە مژارەیل جیاواز  و تەمەنەیان ئەرا زیاترە لە 5000 ساڵ، چوودەو ئەرا شارستانیەت ئاشنۆنا و سۆمەر،  ک  5 لەسەد وەلایەن تیمەیل مینەکردن هەڵکەنین پەیا کریانە و ئەوانەی تر هێمانی هانە ژیر خاک. 

چەن شۊنەوارەیل ئاسەواری لە پارێزگای دیالە پشتگووش خریانە و هەرەشەی لەناوچگن هابانیان وەتایبەت لە ناوچە کشاوەرزی و دۊرەیلە.