کوشیان ١٣ کەس لەلای کەمەو لەوەر گەرمییگ بیوینە لە ئەمریکا

شەپۆلێگ گەرمای سەخت روی لە باشوور ئەمریکا و وەتایبەت ویلایەت تەکساس و لویزیانا کەێد و وەگەردیا پلەی گەرما فرەجار لە ٤٠ پلەی سەدی رەد کەێد، یەیش ریژەیگە کە پسپۆڕەیل چنە ژیری، کە گەرمبوین کەشوهەوا یەکیگە لە هوکارەیلی.

 وێب کاونتی قسەکەر ویلایەت  تەکساس، رووژ جمعەی گوزەشتە، ئەرا ئاژانس فرانس پرێس وت: دە کەس لە  دانیشتگەیل پارێزگاگەمان لەوەر گەرماوە گیانیان لەدەسدانە، وتیش: کەسیگتر  کە لە ناوچەیگ نزیک ژیەێد، بەڵام ئەرا  خەسەخانە بریا، ئەویش گیانی لەدەسدا.

هەفتەی گوزەشتە هەرزەکاریگ لە پارک سروشتی بیگ بێند لەوڵر پلەی گەرمی ٤٨ پلەی سەدی، وە گورەی دەسەڵاتدارەیل ناوچەگە، لە هووش خوەی چگ، ئیجا ژیانی لەدەسدا.

لە ناوڕاس شەپۆل گەرمی، ژنیگ تەمەن ٦٢ ساڵانیش وە مردگی لە شار لویزیانا پەیا کریا، لە ناوچەیگ کە زریانیگ هەزاران خیزان بی کارەبا کرد، و لەوەر ئەوە  تەندروسییان نەویە.

وەزارەت تەندروسی ویلایەتەگە رایگەیانیە، مردنەگەی پەیوەندی وە گەرمی دیرێد.

 لە مەکسیک لە ناوەین ١٢ تا ٢٥ حوزەیران، ١٠٤ کەس لەوەر شەپۆلیگ گەرمی تونیگ گیانیان لەدەسدانە کە بیاوان باکوور وڵاتەگە و پایتەختی گردەو،  وەگورەی راگەیانن حکومەت وڵاتەگە.

 لە باکوور دویر کشوەرەگە، کەنەدا هیمان بەجەرکاری وەگەرد هیزگردن ئاگر گەپیگ کەێد ک  لە جمعەو دەسوەپی کردیە، کە بویە مدوو پیسبوین هەوای بیوەینە لە شارە گەورەیل کیوبیک و ئۆنتاریۆ.

دویکەڵ ئاگرەگەی دارسانەیل کەنەدا درویژە وە ریەگەی خوەی دا وەرەو باشوور، ئەرا ناو خوەرئاوای ناوڕاس و کەنار خوەرهەڵات ئەمریکا، کە ئیسە نزیکەی ١٢٠ ملیۆن کەس وەدەس پیسبوین وا داد و بیداد کەێد.

 رووژ جمعە،  کوالیتی وا لە شارەیلیک جویر نیویۆرک و فیلادلفیا وە ناتەندروس دانریا، وەقسەی پلاتفۆرم حکومەتی Airnow کە کوالیتی وای وڵاتەگە ناسنێد.