چلەی ژینا ئەمینی.. تەقەکردن و دەسگیرکردن نزیک قەورەگەی و بڕین ئەنتەرنێت لە شارەگەی
شەفەق نیوز/ هیزەیل ئەمنی ئیران، ئمڕوو چوارشەممە، تەقە لە مەردم کردن، و دەیان کەس لەلای قەور مەهسا ئەمینی (ژینا) دەسگیر کردن، ک ژینا ئەو دویەتە بوی ک وەرجە چل رووژ وەدەس پۆلیس ئەخلاق کوشیا، و هەمیش دویای ئی رویداوەیلە، ئەنتەرنێت لەو ناوچە بڕین ک قەور ژینا هاناوی.
وەچەودیەیلیگ ئەرا ئاژانس شەفەق نیوز وتن: هیزەیل ئەمنی تەقە لەو مەردمە کردن ک لەلای قەور ژینا ئەمینی لە شار سەقز وە بوونەی چلەی مردنه گردەو بوینە.
وەچەودییگ وت: پۆلیس دژە ئاژاوە تەقە لەو مەردمە کردن ک لەلای قەورەگەی ئەرا چلەی مەهسا گردەو بوینە، و دەیان کەسیش دەسگیر کردن.
ئاژانس خەوەری خوەنوارەیل نیمچە فەرمی ئیران "ئیسنا" وت: وەردەوردە کەفتە ناوبەین هیزەیل ئەمنی و بەشداربویەیل چلەی ژینا ئەمینی لە سەقز.
ئاژانسەگە دیاری کرد ک شمارەی کەمیگ لەوانەگ لەلای قەور ژینا ئەمینی گردەو بوینە کەفتنە وەردەوردە وەرد پۆلیس لە دەورگرد سەقز و دویریان خستن.
ئاژانسەگە وتیش: دویای ئەو وەردەوەردە خزمەت ئەنتەرنێت لەوەرە کارەیلیگ ئەمنی لە سەقز بڕیا، وتیش: نزیکەی ١٠ هەزار گردەو بوین.
هەرلیوا، ریخریاگ هەنگاو مافپەروەری وت: هیزیەیل ئەمن ئیرانی گولە و گاز ئەرا خوەینشاندەرەیل سەقز وەشانن.
کۆمەڵەی نەرویجی ک چەودیاری پێشێلکردن مافەیل لە پارێزگای کوردستان کەێد لەبان تویتەر نویسان: هیزەیل ئەمنی گاز ئەسر وەشانن و تەقە لە مەردمەگە کردن لە مەیدان زندان لە شار سەقز.
ئیرانیەیل، رووژ چوارشەممە، لەوەردەم قەور ئەمینی لە پارێزگای کوردستان ئیران لە چلەی مردنی گردەو بوین، و لەڕوی ریکارەیل ئەمنی سەخت وسیان.
