سوپای پاسدران وە خوەینشاندەرەیل: یە دویاترین رووژە ئەرا ئاژاوە
2022-10-29T11:17:34+00:00
شەفەق نیوز/ حسێن سەلامی فەرماندەی سوپای پاسدران ئیران، ئمڕوو شەممە، هەڕەشەی خوەینشاندەرەیل دا، و دووپات کرد ک یە بوودە دویاترین رووژیگ ئەرا ئاژاوە.
سەلامی لە وراریگ رووژنامەوانی وت: لە ئمڕوو وەرەولا دەرنەچنە جادە، ئمڕوو دویاترین رووژە ئەرا ئاژاوە.
یە هەفتەم هەفتەس لەبان یەک، ناڕەزایەتەیل ئیران گردیەسە وەر، دویای مردن ژینا ئەمینی ئەو دویەت کوردە لە تەمەن ٢٢ ساڵان، هەنای پۆلیس ئەخلاق لە ئەیلوول گوزەشتە دەسگیری کرد.
دویەکە جمعە، ناڕەزایەیل وەردەوەردە ئەرا هیزەیل ئەمنی لە شار زاهدان کردن، ک ناڕەزاییەگە لەوەر توومەتبارکردن پولیسیگ وە دەسدرویژیکردن سێکسی دەسوەپی کرد، ناوچەگە دویای مردن ژینا زیاتر خوینیەو بوی.
