ئەرا پەنجەمەین هەفتە ناڕەزایی لە ئیران تونترەو بوون

شەفەق نیوز/ ناڕەزایی خەڵک شارەیل ئیران، تا دیوشەو جمعە وەردەوام و زیاترەو بوی، هەمیش پاڵپشتیکردن ناودەوڵەتی ئەرا خەڵک ئیران وەرەو زیایبوینە.

گرووپ گەنجەیل گەڕەکەیل تەهران'' و ''شووڕای گەڕەکەیل بۆکان'' و ''بزووتنەوەی گەنجەیل شۆڕشگێڕی سەقز'' و فرەی ئەنجومەن و گرووپ و ریخریاگەیل شارەیل وە بڵاوکردن بەیاننامە و ئاگاداری داوا لە خەڵک کردن ئمڕوو شەممە 15/1/2022 لە ساعەت 12:00ی نیمەڕو لە جادەیل گردەو بوون.

شەو جمعە، لە سنە، بۆکان، سەقز، مەشهەد، شیراز، یەزد، تەورێز و فرەی شارە گەورە و بویچگەیل ئیران وە شیوەی بەسانن جادە  و ری و بازاڕ و سزانن تایەر ماشین و گردەوبوین لەبان جادەیل و وتن دروشم دژوە کۆمار ئیسلامی لەناو ماڵەیل، ناڕەزاییان لەدەس کۆماری ئیسلامی وەردەوام بوی.

دویاێ ئەوەگ لە خوزستان بانگەواز گردەوبوین خەڵک ئەرا ئمڕوو بڵاو کریا ئینتەرنێت لەو شارە بڕیا.

گرووپ گەنجەیل گەڕەکەیل تەهران" وە بڵاوکردن راگەیانەوەی شمارە 10ی خوەیان وە ناو ''سەرەتای کۆتاییگ'' داوا لە خەڵک تەهران کردن لە ساعەت 12:00ی نیمەڕو ئمڕوو لە گۆڕەپان و شەقامەیل گردەو بوون و ئەو کاریانە وە گەورەترین فیلتەرشکن لەقەڵەم دریا،  ئەرا ئاماژە وەوە ک حکومەت گشت تووڕەیل کۆمەڵایەتی  فیلتەر کردیە.

لە لایەن ناودەوڵەتی، باراک ئۆباما، سەرۆک کۆمار وەرین ئەمریکا لە وتاریگ راگەیان، حکومەتەگەی ئەو ساڵ 2009 هەڵە کرد ک پشتگیری لە شۆڕش سەوز ئیران نەکرد و وئویشێد: ''لە شوینیگ بڵویزەی هیوای خەڵک ئەرا ئازادی بکەفێدە وەر چەومان، بایەگە پشتگیریی بکەیمن".

جۆ بایدن، سەرۆک کۆمار ئیسەی ئەمریکایش رووژ جمعە لە کۆلێژیگ لە ویلایەت کالیفۆڕنیا راگەیان: ''من ساڵانیگە لە گۆڕەپان سیاسەت دەرەکی ئامادە بویمە، گوڵپەی ئەو شۆڕشە لە ئیران  هەڵسیایە تویش شۆکم کردیە،  منیش لای خوەمەو ئەو گوڵپە لیوا زوی کپەو بوود.''