سوو ئیران دووارە باڵیۆزخانەی لە سعودیە واز کەێد
سەرچەوە دیبلۆماسیەگە لە ریاز ک ناو خوەی ئاشکرا نەکرد، ئەرا ئاژانس رووژنامەوانی فەرەنسا وت: دووارە وازکردن باڵیۆزخانەی ئیران، ئەوەسا سوو سێشەممە، لە ساعەت شەش ئیوارە وە ئامادەبوین باڵیۆز ئیران لە سعودیە وەڕیەو چوود.
لە مانگ گوزەشتە، رووژنامەی ئیران دەیلی حکومەتی وە زوان ئینگلیزی وت: تەهران عەلی رزا عنایەتی دیبلۆماتیکار پایەبەرز جویر باڵیۆز نوویگ لە شانشین سعودیەی عەرەبی دانەێد، باوجی ئی داناینە وەشیوەیگ فەرمی وەلایەن وەزارەت دەیشت ئاشکرا نەکریا.
عنایەتی ئیرنگە ها پۆست جیگر وەزیر دەیشت، دویای ئەوە ک لە سەردەم سەرۆک حەسەن رووحانی باڵیۆز بوی لە کوەیت.
بینای باڵیۆزخانەگە ک یە چەن ساڵیگە بەسیاگە، دویای خاسەوکردنی وە تەواوی ئەوەسا دووارە واز کریەێد.
لە دەی ئادار گوزەشتە، ئیران و سعودیە رەسینە رێککەفتنیگ وە چەودیاریکردن وڵات چین، ئەرا دووارە وازکردن باڵیۆزخانەیان و جیوەجیکردن رێککەفتنەیل هاوکاری ئابووری و ئەمنی، ک وەرجە زیاتر لە بیس ساڵ واژوو کریانە.
تەهران وت: سەرۆک ئیبراهیم رەئیسی مکیس سەردانکردن سعودیە ئەرای هاتیە، و ئیرانیش مکیس شاه سەلمان کوڕ عەبدولعەزیز ئەرا سەردان تەهران کردگە.
