ئیران بازرگانیگ وە ژن ئەرا ئیمارات دەێدە سێدارە
ئاژانسەگە وتیش: ئمڕوو دەسەڵاتەیل سزای لەسێدارەدان لەبان شەهروز سەخنووری ناسریاگ وە "ئەلێکس" جیوەجی کردن، ک ئەو کابرا لە دۆسیەی دامەزریان و وەڕیەوبردن تووڕ ناودەوڵەتی گەپیگ پەیوەندیدار وە بازرگانیکردن وە ژن و بردن سەدان لەلیان وەرەو ئیمارات و مالیزیا و ئۆکرانیا ئەرا کارکردن لە لەشفرووشی.
دویەکە جمعە، دەسەڵات دادوەری ئیران راگەیان ک فەرمان لەسێدارەدان لەبان سێ کەس جیوەجی کریا ک دەسیان لەناو کوشتن ئەندامەیل هیزەیل ئەمنی بویە، ئەوەیش لەپشت خوەینشاندان پارەکە لەو وڵاتەگە، لە ئەنجام کوشیان ژینا ئەمینی وەدەس پولیس ئەخلاق.
وتنیش: هەرلە ماجد کازمی، ساڵح میرهاشمی و سەعید یەعقوبی لە ناوەن شار ئەسفەهان دریانە سێدارە.
وەرجە نزیکەی هەفتەیگ ریخریاگ وەخشین ناودەوڵەتی هوشداری دا ک سێ کەس لەبان ناڕەزایەتیەیل لە ئیران سزای لەسێدارەدان لەبانیان دەرچگە، دویای ئەوەگ دادگای باڵای ئیران پشتگیری سزایان کردگە، وەی نزیکە کەفنە وەر جیوەجیکردن سزاگە.
ریخریاگ وەخشین ناودەوڵەتی لە نووترین راپۆرتی کە رووژ سێشەممە بڵاوی کرد، وت: لە ماوەی یەک ساڵ وەسێدارەدان لە ئیران وە ریژەی ٨٣% زیای کردیە، هەرلیوا وتیش: ئیران و سعودیە فرەترین وڵاتەیل جیوەجیکەر وەسێدارەدانن لە خوەرھەڵات ناوەڕاس.
