هشکەساڵی هەڕەشە له‌ گەپترین ئاژەڵ عراق دەێد

Category: ڕاپــۆرت

Date: 2022-06-21T11:31:54+0000
هشکەساڵی هەڕەشە  له‌ گەپترین ئاژەڵ  عراق دەێد

شەفەق نیوز/ کەم ئاوی وشەپول هشکەساڵیە ک دەێد لە عراق، تەنیا لەلای کەمەوبوین زەویەیل کشتوکاڵی نەوسیا، باوجی کەفتە هەڕەشە دان  له‌ زنەوەری ئاوی و دەیشتی، ک یە بڕبڕە لە گامیشەیل  کەمەو بوون لەناوچەیل فرەیگ ک وە  ئیوەتکردنی  وه‌ناوبانگ بوین، ئەوەیش لەوەر داوەزین ئاست ئاو لە هۆر وگوڵەمەیل ک دی ئی ئاژەڵە نیەتوەنێد لەناوی مەلەوانی بکەێد.     

ئاژانس شەفەق نيوز، گووش لە قسەی خاوەن گامیشەیل لەی باوەتە گرد، تا بڕەسیمنە راسی ئی قەیران ژینگەیی وئابوورییه‌ ک لە خود وەختەگە بویەسە رخیگ راسی وحکومەت ولایەنەیل پەیوەندیدار هویچ چارەیگ نەکردنە.        

داڵگ نەرگس، پەنج کوڕ و دویەتیگ دیرێد، لە دەورگرد ناحیەی حەمزە شەرقی نیشتەجیە، ئەرا ئاژانس شەفەق نیوز ئویشێد: خوەم تەنیا نییم ک ناچار بیمە لەوەر قەیران ئاوەگە گامیشەیلم بفرووشم، ک هاوساگەم وەرجە خوەم ئی کارە کرد، چوینکە ئیمە ئاو ئەرا ئایەم وەدەسمان نیەکەفێد، ئمجا گامیش چوین ک ئاو قویلیگ خوازێد تا گشت لەشی لەژیری بوود؟.       

قەیرانەیل هاویشتە          

جاسم ئەسەدی، ئەندازیار راوێژکاری لە ریخریاگ سرووشت عراق، دیاری کەێد ک ئیوەتکەرەیل گامیش لە ١٥% تا ٢٥% لە نرخ ئاژەڵەگە زەرەد کەن لەوەر ئەو هشکەساڵیە ک نرخەگەی رەسیە مەلیۆنێگ ونیم دینار ئەرا ، وئەوەسا نرخ ئی ئاژەڵە رەسیادە چوار مەلیۆن دینار.           

ئویشێدیش: ئیوەتکەرەیل گامیش لە پارێزگایل هۆرەیل عراق کەفنە نوای گیچەڵیگ تر دویای ئەو شەپول هشکەساڵیە ک هەر لەساڵ ٢٠١٨ دەێد لە عراق، ک ئاست ئاوەگە کەمەو بوی تا رەسیە ئاست نزمیگ لە هۆرەیل چبایش لە پارێزگای زیقار وهەمیش لە هۆر حەممار.        

ئەسەدی باس ئەوەیش کەێد ک داوەزین ئاوەگە رەسیە کەمتر لە ٩٠ سانتیمەتر لە ئاست روی دەریا، وتەنیا چەن دەریاچەی قویلیگ وجووەیل ئاویگ جویر هۆر تەنک لەلیان مەنیەسەو.        

وتیش: ئاوایەیلیگ هەس زیانیان وەردەوامە هەکاتی ئاوای (حسچە حەلاب) لە هشکەساڵی تیژیگ وەگەرد کەمی لە لەوەڕ، ک نرخ یەک تەنی لە ٣٠٠ هەزار دینار رەسیە ٧٠٠ هەزار دینار.         

کاریگەری لەبان ئابووری         

هادی یاسری قسەکەر وەزارەت کشتوکاڵی دیاری کرد ک هشکەساڵیەگە پەیوەندی قایمیگ وەرد ئیوەتکردن گامیش دیرێد، ک سامان ئاژەڵ عراق، تایبەت ئی ئاژەڵە، وەشیوەی گەورەیگ کەفێدە گاریگەری لەوەر هشکەوبوین گوڵەمەیل ئاو، ک شوین بنچینەییە ئەرا ئیوەتکردن گامیش.         

وتیش: وەزارەتەگە دەسداوەر لە دابینکردن لەوەڕ هشک وتویەم لەوەڕ ئەرا کاڵینی، تا پاڵپشتی وگاڵ جفتیارەگە بەێد، وبمینێدە بان ئاژەڵ وزەویەگەی، ئەوەیش وەگەرد هەماهەنگی پاڵپشتیکردن ناودەوڵەتی ئەرا مقەیەتیکردن گامێش لەو زەرەدە ک هشکەساڵی وەپی رەسنێدەی.        

ئەحمەد عید، پسپۆڕ باوەت ئابووری دووپات کەێد ک سامان ئاژەڵ یەکیگە گرنگترین پایەیل ئابووری لەو وڵاتەیلە ک توانای ئیوەتکردن ئاژەڵ و مامر دیرن، چوینکە گرنگییگ لە پڕکردن داوای سەرەکی ئەرا خیزان عراقی دیرێد، باوجی لە ئاست بەرهەم سامان ئاژەڵ لە عراق بەش ناوخوەیی نیەکەێد، ئەوەیش لەوەر بەدی ئەو سیاسەت ئابووریە ک عراق دویای ٢٠٠٣ وەخوەی دوینێد.        

وتیش: بەرهەمەگە لەوەر چەن هووکاریگ وەشیوەی گەورەیگ داوەزی، بەشیگ سرووشتی و بەشیگیش مرۆیی، وکاریگەریی سرووشتی کەفێدە هشکەساڵی وکەمی لە تەکان ئاوەگە وداوەزین ئاست کاڵین لەوەڕ، و مرۆییەگە کەفێدە پشتگووشخستن حکومەتەیل هاوپشتە لەی کەرت گرنگە، لە کەم پاڵپشتیکردن و دروسنەکردن دەرفەتەیلیگ راسی ئەرا بەرهەم ناوخوەیی، و زیایبوین ئاست هاوردە.        

وتیش: گرنگترین گیچەڵ ک هیمان کەفێدە وەر ئیوەتکردن گامیش لە عراق خوەی گرانی لەوەڕ ونەمان پاڵپشتیکردنە، ک مەترسییگ راسی لەبان سامان ئاژەڵ وەشیوەی گشتی دروس کەێد ولەبان گامیش وەتایبەت، ئەوەیش وەگەرد رویکردن ئیوەتکەرەیل وەرەو شار، ک فرەیان لە بووسان وهۆرەیل واز هاوردن ورویکردنە شارەیل، چوینکە وەپیان نەکریا کار خوەیان وەردەوام بکەن لەوەر ئەو زەرەدەیل گەورە ک وەپیان رەسێد.      

ئەحمەد عید لە کۆتایی قسەیلی وت: بایەتە دەوڵەت پابەندی خوەی وەجی بارێد ک وەگورەی راگەیانن یاسای پاڵپشتی فریاکەفتن لە ئاسایش خوەراک وئەوزەڵکردن جیوەی ئەوە بکەێد، و پاڵپشتی کەرت سامان ئاژەڵ بکەێد، وئابووری نیشتمانی عراق وە داهاتەیل ئی کەرت گرنگە قایم بکەێد.

related

بەرزەوکردن وزە و ئابووری... رێککەفتن ستراتیژی مابەین عراق و ئوردن

Date: 2021-12-05 17:42:30
بەرزەوکردن وزە و ئابووری... رێککەفتن ستراتیژی مابەین عراق و ئوردن

ملیارەیل کارەبا دریەێدە هەوا و گەندەڵی وەزیرەیل رەسێدە گیرفان نەدارەیل

Date: 2022-01-05 10:30:00
ملیارەیل کارەبا دریەێدە هەوا و گەندەڵی وەزیرەیل رەسێدە گیرفان نەدارەیل

خانەنشینەیل عراق بازاڕ خانی تورکیا گەرم کەن

Date: 2022-01-21 11:22:29
خانەنشینەیل عراق بازاڕ خانی تورکیا گەرم کەن

قەیران خوەراک لە عراق.. دۆلار ئەرزان ئەرا پۊچەڵکردن بومب

Date: 2022-03-10 06:48:29
قەیران خوەراک لە عراق.. دۆلار ئەرزان ئەرا پۊچەڵکردن بومب

لافاو گرانی خوەراک بازاڕ عراق ماڵێد

Date: 2022-03-19 20:26:54
لافاو گرانی خوەراک بازاڕ عراق ماڵێد

ئایا ساڵەیل سەخت لە هەرێم کوردستان خەو "هۆنگ کۆنگ خوەرهەڵات ناوڕاس" لە هۊر برد؟

Date: 2022-04-13 06:36:09
 ئایا  ساڵەیل سەخت لە هەرێم کوردستان خەو "هۆنگ کۆنگ خوەرهەڵات ناوڕاس" لە هۊر برد؟

له‌ ناسریە.. ئەرزش پارچە زەوییگ وەگورەی ڤیلایگە لە تورکیا

Date: 2021-05-08 12:42:57
له‌ ناسریە.. ئەرزش پارچە زەوییگ وەگورەی ڤیلایگە لە تورکیا

نەداری و ئەنتەرنێت گەورەترین هوکارە... راپۆرتیگ باس بازرگانی وە ژن و خوەیفروشتنیان کەێد

Date: 2022-04-29 06:44:35
 نەداری و ئەنتەرنێت گەورەترین هوکارە... راپۆرتیگ باس  بازرگانی وە ژن و خوەیفروشتنیان  کەێد