شمارەی ئەو کەسەیلە لە پاکستان لەوەر وارانە رفتەیلە گیان لە دەسدانە رەسیە هەزار و 208
2022-09-02T09:05:08+00:00
شەفەق نیوز/ وەپای خەوەریگ لە ئاژانس ئانادۆلۆ بڵاویکردیە راگەیان شمارەی ئەو کەسەیلە لە ۱٤ حوزەیران تا ئیسە وە مدووی وارانە وەرزیەگە گیان لە دەسدانە رەسیەس وە هەزار ۲۰٨ کەس.
وەپای زانیاریەیل ئاژانس ئیدارەی کارەسات نیشتیمانی پاکستان (NDMA)، لە ١٤ی حوزەیرانەو تا ئیسە لە سەرەپای وڵاتەگە وە مدووی کاریگەری وارانوارین وەرزی، هەزار و ٢٠٨ کەس گیان لە دەسدانە و شەش هەزار و ٨٢ کەسیش زەخمداربوینە.
پەنج هەزار و ٦٣ کیلۆمەتر ریوبان زەرەد وەری کەفتیە، ٢٤٣ پیەڵ و ١٧٣ دوکان رمیانە.
وە مدووی لافاویش، یەک ملیۆن و ١٧٢ هەزار و ٥٤٩ ماڵ زەرەد رەسیەسە وەپی و لەو شمارەیش ٤٣٦ هەزار و ٣٠٧ ماڵ وە تەواوی ڕمیانە.
لافاوەیلە کاریگەری لەبان ژیان ٣٣ ملیۆن و ٤٦ هەزار هاووڵاتی پاکستان دروسکردیە و ٧٣٣ هەزار و ٤٨٨ ئاژەڵیش لەناوچینە.
