چوون عەبدولمەهدی رمیا و پشت پەردەیل سەردانەگەی کازمی ئەرا تەهران.. شیکردنەوەیگ ئیرانی ئاشکرای وردەکاریەیل سەرنجڕاکێش كه‌ید
شەفەق نیوز/ شیکردنەوەی ماڵپەڕ ''دبلۆماسی ئیرانی'' دووپاتکرد ک بایەسە حکومەت عراق پەیوەندی هاوسەنگی دروس بکەێد وەگەرد سێ تەوەرەگی عەره‌ب، ئیران وئەمریکا، ئەرا مقەیەتی لەبان ئارامی، و فراوانکردن پەیوەندیەگان وەگەرد لایەنیگ نەبایس لەبان بەرژەوەنی لایەنیگ تر بوود.
سەید عەلی موسەوی خه‌لخالی وەرپرس ماڵپەڕەگە ک تایبەتە وە باوەتەیل دبلوماسی تەهران، لە شیکردنەوەگەی ک ئاژانس شەفەق نیوز لە فارسیەو وەرگێڕانی کردگە، وت: لە دویادویای هەفتەی گوزەیشتە موستەفا کازمی چی ئەرا ئەمریکا، ودۆناڵد تڕامپ پێشوازی لەلی کرد، وئووشن لە بان فەرمان تڕامپ لە بەرزترین ئاست پێشوازی لەلی کریا . سەردانەگەی کازمی ئەرا ئەمریکا لە دویای مانگیگ تیەێد لە سەردانی ئەرا ئیران، هەمیش سەردانەگەی ئەرا ئیران رێز گەورایگ وەرگرد و وەفەرمی و لەبەرزترین ئاست پێشوازی لەلی کریا، و هەمیش سەردانەگە ئەنجامەیل فرە خاسیگ وەدەس هاورد، وهەردوگلاگە باس لە خوەشحاڵییان کردن.
خلخالی وتیش؛ لە رووژ شەممە کازمی هاتەو ئەرا بەغداد، ولە رووژ سێشەممە رووکردە ئوردن ئەرا ئامادەبوین لە سێیەم لووتگەی سێانی لەناونی عراق و ئوردن و میسر لە عەمان، ک لەلایەن شاه ئوردن وه‌ل شازاده‌ی كوڕی و هەمیش سەرۆک وەزیران لە فڕۆکەخانە پێشوازی گەورایگ لەلی کریا. لە سەردانیگ ئەرا یەک رووژ وەپی چگ، هەرسێ لایەنەگە ''ئوردن- عراق- میسر'' بەیاننامەیگ دەرکردن ك دووپاتکەێد لە گرنگی رەسین وە كێشه ئاڵوزەگان لە ناوچەگە و پاڵپشتی باوەتە فه‌له‌ستینیەگە و دروسکردن دەوڵەت فەلەستین سەروەخوەی لە قودس پایتەخت.
خه‌ڵخالی ئاماژە دەێد؛ ئەی سێ مانگە ک لەبان وەرگردن کازمی ئەرا پۆست سەرۆک وەزیران رەد بوین، ئەوە دەرخەن ک دینامیکی و گورجییگ هەس، و زانریاگە ک پشتگیری ئەمریکیەگان دیرێد، جوور یەکیگ لە وەهێزترین خاوەن کاریگەری لە عراق، بەڵکم لە خود وەختەگە، کۆمار ئیران ئیسلامی نێنووڕیدە کازمی جوور سەرۆک وەزیرانیگ ک وەدڵیان نیە دویر لە بەرژەوەنیەگانی، ک پێشوازیکردنە گەرمەگە لە تەهران ئەوە دووپاتکەێد، ئەراوە توێنیمن بووشیمن ک ئیران وەشیوەیگ لە شیوەگان پشتگیری کازمی کەێد.
هەمیش ئووشێد: کازمی گەشتەگەی لە ئیران دەسکردەپی، ک یەکەم ویستگەیلی بوی لە جوولە دەیشتیەگانی، ک هیچ سەرۆک وەزیر عراقییگ یەکەم گەشتەگانی لە ئیرانەو دەسوەپی نەکردگە، سەردانەگە گرنگی راگەیانن گەورایگ وەخوەی دی، و هەمیش ناڕەزایەتی نا ئاشکەرایگ لەلایەن سعودیەگان، ک بایەسە سەردانە یەکەمەگەی کازمی ئەرا سعودیە بویاتاد، بەڵکم شکست هاورد لەوەر راگەیانن لە بیماری شاه سەڵمان، دویای ئەوە وەوەخت کەمیگ، کازمی روی کردە ئەمریکا، و وەرجە گەشتەگەی راگەیان خوەی پەیامنێر نیە و هیچ پەیامیگ لە لایەن ئیران ئەرا ئەمریکیەگان وەرنەگردگە.
هەکاتی گشت وەرپرسەگان، کازمی تەقەلا دەێد وڵاتەگەی لە ناکۆکیەگان ناوبەین ئیران وئەمریکا دویرەو بخەێد، ولەخود وەختەگە، خاس زانێد ک بایەسە هاوسەنگییگ لە پەیوەندیە ناودەوڵەتیەگانی پەیا بکەێد.
خه‌لخالی هەمیش ئووشێد؛ پێشوازیەگە لە کازمی لە تەهران وواشینتون، لە بەرزترین ئاست بوی، جوور هەوڵدانیگ تا نشان بیەێد ک خوەی تەقەلای مقەیەتی هاوسەنگی لە پەیوەندیە ناودەوڵەتیەگان عراق دەێد، هەرچەن کازمی نەچگ ئەرا سعودیە، بەڵکم ئامادەبوی لە کۆبونەوەیگ سێیانی، ئەرا نشانداین ئەوە ک عراق ئەرزشدار پەیوەندیە عەرەویەگان کەێد وەگورەی پەیوەندیە ناودەوڵەتیەگان، وهەمیش ک خوەی پەیوەندیە عەره‌بی ئیرانی ئەمریکی هەرسێگی وەگەرد یەک خوازێد ، تا ئەرزش ئی تەقەلا رووشنتر ئاشکرا بوود وەختا نووڕیمن ک کازمی پلانیگ ئەرا سەردان تورکیا نەیرێد، جوور یەکیگ لە وەهێزترین دەوڵەتەیل ناوچەگە، ک ناکۆکیەگان وەگەرد ئی وڵاتە رووژ وە رووژ زیایەو بوود، و هەمیش ئەرزش شوون ئیران لە پەیوەندیە نا عەرەبیەگان عراق.
و ئاماژە دەێد؛ قسەی وەرپرسەیل فرەوەبوی، و شافەگان فرەوەبوین ک کەفتن عادل عەبدولمەهدی لەوەر ناڕەزایی ئەمریکیەگان بوی وه‌خاتر نزیکی لە ئیران و وەپشتگووش خستن داواکاریەگانیان، ک نووڕستیمن، چوار جار داواگەی عەبدولمەهدی ئه‌را سەردان ئەمریکا رەت کریا، و لە کۆتایی ئەنجامی نەیا، ئەوە چوودەو ئەرا پابەندنەوینی وە سزا ئەمریکیەگان لە بان ئیران.
پەنیگ تر هەمیش دریەێد؛ ک نووڕستیمن لە سەردەم مالکی، ئەو باج گەورا ک عراق داگەی لە باوه‌ت ئەمنی لەوەر وەپشتگووشخستن دەوڵەتە عەربیەگان، لەلیان کارەسات دەرچگن داعش بوی، ئەراوە، وئەرا مقەیەتی ئارامی، بایەسە حکومەت عراق پەیوەندی هاوسەنگیگ دروس بکەێد وەل سێ تەوەر عەرەبی ، ئیرانی وئەمریکی، و دیارە ک فراوانکردن پەیوەندیەگان لە یەک لایەن نەبایەس لەبان بەرژەوەنی لایەنیگ تر بوود.
