پەیامیگ ئەرا بەغداد: قەیران دارایی رەسێدە هونەرمەنەیل سلێمانی
ناسر رەزازی، هونەرمەن گەورەی کورد، ئەرا ئاژانس شەفەق نیوز وت: کار هونەری لە سلێمانی، و وەیجویرەیش لە زاخۆ تا خانەقین، خاس نییە، لەوەر ئەوە ک پویلیگ وەپشتدەس نەخریاگە تا جموجویل رووشنهویری و هونەری وەلایەن وەزارەتەیل پەیوەندیدار وەردەوام بوود.
وتیش: گشتی زانێد ک هەر پڕۆسەیگ بایەتە پویلیگ ئەرای تەرخان بکریەێد، باوجی هویچ پویلیگ ئەرا هونەر نییە، و داوای تەرخانکردن پویل لە بەغداد ئەرا جموجویل هونەری لە کوردستان کرد، چوینکە هەرێم کوردستان بەشیگە لە حکومەت فیدڕاڵی، و بایەتە ئەرک چەودیاریکردن هونەر و وەردەوامیی بکەفێدە گەردن حکومەت عراق.
رەزازی دیاری کرد ک هونەر و ئەدەب وڵاتەگە بەرزەو کەن و پەیام مرۆیی گەل رەسنن، نەگ نەفت و گاز ک لەبانی جەنگ کەن، بەڵکم بایەتە سوود لە داهاتەیل نەفت بگریەێد ئەرا قایمکردن هونەر و روشنهویری، ئەراوە، بایەتە هونەر و روشنهویری بەش خوەیان لە پویل بیاشتوون، تا هونەرمەن پەنا وە دەوڵەمەنەیل نەوەێد، تا گورانییگ توومار بکەێد یا پیشانگایگ بسازێد.
لەلای خوەییش، هوەرمەن کورد سەعدون کاکەیی دووپات کرد ک ئەرک هونەر خوەی دروسکردن ژیانە و بەرهەمهاوردن دەرفەتەیل ناویە، و لەناو زیان دەرچوود، چوینکە رەوش سیاسی و دارایی کاریگەریی لەبان رەوش هونەرمەن لە سلێمانی کەم نەوی.
سەعدون کاکەیی لە قسەیلی ئەرا ئاژانس شەفەق نیوز وت: بەشیگ لە هونەرمەنەیل چەوەڕی تیکەگە کەن خوەی ئەرایان باێد، وەلێ بایەتە هونەرمەن رەنج بکیشێد و دەرفەت دروس بکەێد، چوینکە هونەرمەن لەبانی نویسیاگە ک بایەتە خزمەت جەماوەری بکەێد.
وەرانەوەر ئەوە، موحسن ئەدیب وەڕیەوبەر گشتی روشنهویری و هونەرەیل لە پارێزگای سلێمانی وەڕی ئاژانس شەفەق نیوز داوا لە وەزارەتەیل روشنهویری و هونەرەیل عراق و هەرێم کوردستان کرد پشتگیرییگ گەورەتر ئەرا جموجویل رووشنهویری بکەن، و باس گرنگی هەماهەنگی ناوبەین وەڕیەوبەرایەتی گشتی رووشنهویری و هونەرەیل سلێمانی وەگەرد وەزارەت روشنهویری فیدڕاڵی کرد، چوینکە سلێمانی وە پایتەخت روشنهویری لە هەرێم و لە عراق فیدڕاڵی دریەێدە قەڵەم.
ئەدیب وتیش: وەڕیەوبەرایەتی گشتی روشنهویری و هونەرەیل خوەی تەنیا نیەتوەنێد گشت خوازینەیل چین هونەری و روشنهویری دابین بکەێد، چوینکە سلێمانی پایتەخت رووشنهویریە لە هەرێم کوردستان، و یەسە ک شمارەی گەورەیگ لە روشنهویر و نویسەر و هونەرمەن هاناوی.
وتیش: دابینکردن خوازینەیل جموجویل رووشنهویری ئەرک حکومەت هەرێم کوردستان و وەزارەت روشنهویری فیدڕاڵە، چوینکە سلێمانی وە ناوەندیگ گرنگ ئەرا روشنهویری و هونەر لە عراق دانریەێد، نەگ تەنیا لە هەرێم کوردستان، و عراق توەنێد شانازی وە بەرهەمەیل هونەری و روشنهویری ئیرا بکەێد، ک هاوماڵی وەرد بەرهەمەیل جەهانی کەێد.
جموجویل رووشنهویری و هونەری لە سلێمانی کەفتیەسە قەیرانیگ دارایی لەئەنجام رەوشەیل سیاسی و ئابووری لە هەرێم کوردستان، وەماوەی نۆ ساڵ گوزەشتە، ک هیشت فرە لە هونەرمەن و روشنهویرەیل واز لە کار داهێنان بارن.
