نزیک بوی تەڵ کارەبا کەلەمەیگ لە هەڵوژاردەی ئەرجەنتین بخەێد
2022-12-20T09:05:12+00:00
شەفەق نیوز/ لیونێل میسی ئەسارەی تووپان ئەرجەنتین و هاوڕیەیلی، وەگەرد دەسکردن وە ئاهەنگ پاڵەوانەیل جام جەهانی قەتەر ٢٠٢٢، دویای رەسینیان ئەراک بوینوس ئایرس پایتەخت ئەرجەنتین، کەفتنە وەر رخ گەورەیگ.
دویای رەسین بازیگەرەیل و تیم هونەری و ئیداری هەڵوژاردەی ئەرجەنتین ئەرا فڕۆکەخانە، پاسیگ بان واز چەوەڕییان کرد تا ئەرا ناوەند راهێنانیگ بوەێدەیان، تا لەورا ئاهەنگ وە سەرکەفتنیان بکەن.
لەبان ئەو پاس بان وازە، وەژیر تەڵ کارەبا رەد بوین، ک میسی لەناوڕاس برادەرەیلی نیشتیە، و میسی سری داگرد، و مەردمەگە هاوار کردن تا مقیەتی خوەی بوود لەو تەڵ کارەبا ک شووڕەو بویە، و فرە لە نزیک سەر میسی و بازیگەرەیل بوی.
