چشت ئەڵاجەوییگ.. ژنیگ چینی یە ٤٠ ساڵە نەخەفتگە
شەفەق نیوز/ خانمیگ چینی سەرسام زانایلە کرد، ک یە چل ساڵە نەخەفتگە.
لی زانیینگ خان، لە کەرت خەنان خوەرهەڵات وڵات چین، ئەرا میدیایل راگەیانن وت: لە پانزە ساڵان تەمەنی تا ئیسە خەو وەبان چەوی نەکفتگە.
شویەگەی لی و هاوسایلی ئەرا میدیایل راگەیانن چینی باس راسیەگەی ئەو چشت ئەڵاجەویە کردن، ک ئەرا چەن ساڵیگە ئی ژنە نەخەفتگە.
هاوسایلەی لی وتن: خوەیان چینە بندرەس قسەیلی، ک بڕیار دان وە تۆڕە وەگەردی دانیشن تا بزانن راسە نێخەفێد، و راس دەرچگ.
لیو سوکوین شویەگەی لی هەمیش دووپات کرد ک لی نێخەفێد، وتیش؛ لە وەختیگ سویر کردنە هەمیشە گشت شەوانی کار ناوماڵەگە کردیاد.
لیو تەقەلا دا دەسمیەتی ژنەگەی بەێد تا بخەفێد، ک لە خوەیەو تەنیا لەوەر نیگەرانی نێکەفێد، تا چک حەپ خەفتن ئەرای هاورد، وەلی هیچیگ ئاڵشت نەوی، و هەر و خەوەر بوی، وەگورەی باسکردن رووژنامەی «زا سەن» بەریتانی.
چشت ئەڵاجەوییگ
لی داوای دەسمیەتی لە پزشکەیلە کرد، و توانای هیچ دیاریکردن ووردیگ ئەرا ئی کاریە نەیاشتن، ک هیشتەی روی وەرەو یەکیگ لە بنکەیل خەفتن بکەێد لە پەکین، تا تیمیگ لە پزشکەیلە رەسینە ئەوە ک لی وەڕاسیەو خەفێد، وەلی نەگ جوور خەفتن مەردم.
زانایلە وتن؛ لی چوودە ناو خەو، نەک لەوەخت ئەڵاژین لەبان شەوخەفەگە، و نەگ لە مەوقەی چەو بەسین، باوجی هەنای -ئەرا نموونە- وەرد شویەگەی قسە کەێد، ک جوولەی چەوەیلی کەمەو بوود، و چوودە خەو، و خوەییش دیرێد قسە کەێد.
ئامێر چەودیریکردن شەپۆلەیل مەغز، دەرخستن ک تەنیا دە خولەک لە مەوقەی چەو بەسینی خەفێد.
زانایلە وتن؛ یەیشە جوور ریکردن دەمخەویە، ک لەشەگە لە مەوقەی خەفتنیش گورجە.
