بەرزەوبوین تووشهاتنەیل کۆڕۆنای زیقار و کەلەمەی خەسەخانەگە تیکڵا بوون

شەفەق نیوز/ سەرچەوەیگ پزشکی لە فەرمانگەی تەندروسی زیقار، ئمڕوو چوارشەممە، خەوەردا ک پارێزگاگە تووشهاتنەیل بیوەرینیگ وە ڤایڕۆس کۆڕۆنا تۆمار کرد.

سەرچەوەگە ئەرا ئاژانس شەفەق نیوز وت: زیقار ١٠٥٨ تووشهاتن نوو وە ڤایڕۆس کۆڕۆنا لە ماوەی ٢٤ ساعەت گوزەیشتە تۆمار کرد، ک خوەی بەرزترین رێژەی تووشهاتنە پارێزگاگە لەوەخت بڵاوبوین پەتاگە تا ئیسە.

وتیش؛ ئی شمارەی تووشهاتنەیلە لە بنچینەی ٢٩٩٢ کەس بوی ک نموونەی تاقیکردنەوە لەلیان بریا.

سەرچەوەگە دیاری کرد ک وەیجوورە پارێزگاگە لە ٦٠ هەزار تووشهاتن وە ڤایڕۆس کۆڕۆنا رەد کرد، وتیش؛ زیاتر لە ٥١ هەزار تووشهاتگ لە پەتاگە خاسەو بوین، و زیاتر لە ١٠٠٠ بیمار لەوەر ڤایڕۆسەگە مردنە.

ئی بەرزەوبوینە لە تووشهاتنەیلە دویای دوو رووژ لە کەلەمەی سزیان خەسەخانەی ئەلحوسەین لە شار ناسریە تیەێد، ک ٦٠ قوربانی وەجی هیشت.