دادکاری کەیوانوویگ وە تاوانەیل نازی وەرجەەد ٨٠ ساڵ

تووڕ "سی ئێن ئێن" وت: خانمیگ «چاپکەر» وەرین لە سەربازگەی دەسوەسەرکردن نازی، سزا دریا، لەبان ئەوە ک دەسی لەناو کوشتن 10505 کەس بویە، مەوقەی داگیرکردن پۆڵەندا وەلایەن نازی.

ئیرمگارد فۆشنەر ئەو ژنە لە زیندان "شتوتهۆف" نزیک شار گدانسک لە پۆڵەندا کار چاپکردن کردیە، ک لە ساڵ ١٩٤٣ تا کۆتایی رژیم نازی لە ساڵ ١٩٤٥  وەلایەن نازیەیل داگیر کریا.

ئەوە کەسە ک لەلای سوپا کار (چاپ) کەێد، سەرپەرشتی ئەرکەیل ئیداری و نویسانن و چاپکردن کەێد، و ئەو کەیوانووە چاپکەر بویە، و هاتێ وەرپرسە لە خشتەی گردەوبیون و ریکارەیل هامشوو.

سەرچەوەگە وت: دادکاری فۆشنەر لە دادگایگ لە ئیتزیهۆی باکوور ئەڵمانیا جیوەجی کریا، ک سزای دوو ساڵ زیندانی وەگەرد وسیان جیوەجیکردن لەبانی دەرچگ.

هەرچەن کەیوانووەگە ئمڕوو تەمەنی ٩٧ ساڵە، باوجی خریا وەردەم دادگای ناخاڵەیل، چوینکە لە سەردەم تاوانەگە تەمەنی خوار ٢١ ساڵان بویە.

وەگورەی لیست توومەتەیل دادگاگە، فۆشنەر بەشدار لە تاوان کوشتن بویە لەناو زیاتر لە ١١٠٠٠ باوەت، و تاوانبار وە دەسمیەتیداین وەرپرسەیل سەربازگەگە کریا وە کوشتن زیندانیە لەناوبەین ساڵەیل ١٩٤٣ و ١٩٤٥.