خەرەیل ماردین تورکیا خوەشیان لە میوزیک بیتهۆڤن تیەێد
شەفەق نیوز/ وەگەرد هەڵاتن خوەرەگە، ئەو خەرەیلە ک ناویان وە (کادیفێ، غاداش، مافیس، جیڤو، بوزو) نریاگە، دەسکەنە گەردینیان ئەرا گردەوکردن زواڵە لەناو کۊیچە کۆنەیلە وەگەرد شارەوانی شار ماردین لە تورکیا.
ئی شارە ک ماڵەیلی وە سەنگ دروس کریانە، و فرەجار قەواسەی یەکیگ لە ماڵەیلە بوودە بالەکۆن ماڵیگ ترە، و ئەوەگ یەکەم جار سەردان ئەو شۊینە کەێد، وە ئاسانی وڵەو بوود، چۊنکە جادەیل و پاچینەیلی هانە ناو یەک. یە سەدان ساڵە ئەو شارە وە دەسمیەتی خەرەیل پاکەو کریەێد، چۊنکە وە شیوەیگ تر ئەو کارە ئەنجام نێوود.
ئی خەرەیلە ک شمارەیان رەسێدە ٤٠ خەر، و هەر خەریگ ناو خوەی دیرێد، گشت رووژیگ لەی شارە بان و خوار کەن و کارمەنەیل شارەوانی باریان کەن. ئی خەرەیلە هەمیش وە کارمەن شارەوانی دریەنە قەڵەم، ک رووژیگ ٨ ساعەت کار کەن، و نێمەڕوانە هوچان چوار ساعەتی دیرن.
کارمەنەیل شارەوانیەگە و خەڵک شار ماردین ئەو خەرەیلە وە زیرەک و فرەزان و خزمەتکار زانن، ک هەمیشە خوەیان وەرەو تەۊلەیل خوەیان گلەو خوەن، و هەنای گووش لە میوزیک بیتهۆڤن گرن، وە ئارامی و ئاسودەیی کار خوەیان ئەنجام دەن.
