خێر ئەرا خاوەنی گلەو خوەێد
خانمە مامووستایگ لە کولێژ پزشکی، لە سەر ساڵ خوەنەواری هاتە ناو و ئەرا خوەنەوارەیل وت: هەر کەسیگ لە ئیوە پویل سەنین کتاوەیل من نەیرێد، با ناو خوەی ئەرام کل بکەێد، تا وە پەتی بوەێدەی.
خوەنەوارەیل وە خەنستنیگ وتن؛ خوو وەیجویرە گشتمان ئویشیمن پویل نەیریمن، و گشتمان وە پەتی کتاوەیلد بەیمن، و تویش زەرەد گەورەیگ تیەید.
خانمە مامووستا وت: قەی نەیرێد، با ئی باسە ئەرادان بویشم:
سیروان باوگیگە تەنیا دویەتیگ دیرێد وەناو (ئەسرین)، پاسیگ بویچگ دیرێد، لەناو شارەگە وەپی کار کەێد، دویەتەگەی رەسیەسە کولێژ پزشکی، و پەڵپ ١٥٠ هەزار دینار لە باوگی گردیە، کە بایەسە سوو کتاو و پاڵتاو زانکۆ وەپی بسینێد.
باوگە وت: دویەتم ئیرنگە م ئی پویلە نەیرم، با ئمڕوو کار بکەم، تا بەشکی گردەیەو بکەم.
سیروان ناو خودا هاورد و سوار پاسەگەی بوی، و دەسکردە کار، تا ئیوارە، هیمان ئەو پویلە گردەو نەکردیە.
وە ئومید گردەوکردن پویلەگە ئەرا تەنیا دویەتەگەی، تا شەو لەناو جادەیل مەن، و ریواڕیگ لە دەیشت نەمەن.
سیروان سەد هەزار دینار گردەو کردیە، هیمان پەنجا هەزاری مەنیە، و شەو هاتیە، و قمشی نیەکەێد بچوودە ماڵەو، تا دڵ ئەسرین نەشکێد.
تا بەنزین لەناو ماشین هەس، و تا هاز لەناو لەشم هەس، با مینەی کەسەیلیگ بکەم بەشکی سوار بوون، وەیجویرە سیروان وەگەرد خوەی وتیاد.
دی دەس لە کار شوورد، و وەرەو ماڵ رانی، کابرایگ وە قات کەشخەیگ لەناو ریەگە سیروان وسان، وت: خێریگ بکە و بوەرەم تا ماڵ، سیروانیش وت: فەرموو سوار بوو، پیاگیش سوار بوی، و وت: ماشینەگەم لەلیم دزیا، و هەگ رەسیمنە ماڵ پویل کرای ماشینەگەد وەپید دەم.
سیروان وە روی خوەشیگ وت: پویل چەس، تا خوەد بیوەیید هویر پویل مەکە، لەبان ئەوەیش، م نیاز داشتم بچمە ماڵ، و هەناێ ئی ماشینە سەنم، من و رەحمەتی ژنەگەم پەیمان دایمن، کە دویاترین ری وەرەو ماڵ هەر کەسیگ سوار بوود وە پەتی بوود و پویلیگ لەلی نەوەم.
هەناێ رەسیە ماڵ، کابرا وت: گڕیگ چەوەڕییم بکە، خوازم مناڵەیلم بوینم و دڵنگ ئاڵشت بکەم، ئمجا ئەرا ئاسایش بچیمن تا سکاڵا لەبان دزیان ماشینەگەم توومار بکەم.
هەگ چگە ماڵەو، کابرا وە هاوار هاتە دەیشت، وە سیروان وت: کاکه بڕەسە هانام، بوتڵ غازەگە واز بویە، و ژن و مناڵەیلم لە هووش خوەیان نیین.
سیروان خیزان ئەو کابرا رەسانە خەسەخانە، و وە دیاریان مەن، تا هاتنە هووش خوەیان و خاسەو بوین، دووارە سواریان کرد، و ئەرا ماڵ خوەیان گلیانەو دا، و رازی نەوی پویلیگ لەو کابرا بوەێد.
کابرا وە سیروان وت: ئەرا ئی کار مەردانە، خوازم بویمنە برا، و داوا لەلید کەم، خوەد و خیزانەگەد سوو میوانمان بوین، و ئەو دویەتە کە وینەگەی هاناو ماشینەگەد ناوی چەس؟، وت: تەنیا ئی (ئەسرین)ە دیرم، منیش ناوم سیروانە، و سوو تیەیمن تا سەردان خیزانەگەد بکەیمن.
سیروان چگە ماڵ خوەی، و ئەسرینیش چەوەڕی دەس باوگ کەێد، باوگیش پویلەگەی تەواو نەکردیە، و ئەرای باس پیشهاتەیل ئمشەو کرد، وەلێ ئەسرین گلەیی کرد کە بایەس بوی پویل لەو کابرا بوردیاد، چوینکە فرە گرنگ بوی ئەو چشتەیلە بسینێد، باوگ وەپی وت: خێر ئەرا ئایەم خاسترە لە پویل.
ئەرا ئی رووژەگە، شیرین سەد هەزار برد، و چگ تا بەشکی کار خوەی رێک بخەێد، بەشیگ لە کتاوەیل سەن، و ئەو بەشەگە نەیاشت بسینێد، ئەراوە کلی ئەرا لای سەرۆک زانکۆ کردن.
ئەسرین دا لە دەر و چگە ناو ژوور سەرۆک زانکۆ، سەرۆک زانکۆ وت: ت ناود ئەسرینە؟
ئەسرین: ئا مامووستا
-باوگد ناوی سیروانە، و پاسیگ بویچگ دیرێد؟
ئەسرین: ئا مامووستا.
مامووستا: دویەشەو باوگد خوەم و خیزانم لە مەرگ قورتار کرد، ئەوە هەرچەگ خوازید بوە، و ئەمروو خوەد و باوگد میوان ئیمەین.
خانمە مامووستا، باسەگەی تەواو کرد، و وت: ئیسە با یەکتری بناسیمن، من ناوم دکتۆر ئەسرین سیروانە.
