وێنە.. وەزیاتر لە ١٠٠٠ پارچە پیاویگ ماڵەگەی کەێدە پێشەنگای کەلتوور کوردی
شەفەق نیوز/ لە هویرمان ئەحمەد دیروشی نەوی ک ئەو شەش پارچەی کەلتووری کوردیە ک لە باوگی ئەرای وەجی مەننە، و دابەشکردنی لەناو ماڵەگەی لە شار دێریک وەیەکجاو بوودە پێشەنگایگ فلکلۆری ک کورد لە باکوور و خوەرهەڵات سوریا ئەرای تیەن.
پێشەنگای دیرشوی ک نازناوەگەی (ئەبو شەڤان)ە، ئیسە ١١٣٥ پارچەی فلکلۆری هاناوی پەیوەندی وە کەلتوور ناوچەگە دیرن، هەرچەن شوونەگە تەنگە، بەڵکم وەشیوەی خاسیگ ڕێکی کردگە.
ئەبو شەڤان ئەرا ئاژانس شەفەق نیوز ئووشێد: هویر وازکردن پێشەنگاگە لەوەر ئەوە هات ک دووس کەلتوور کوردی دیرم، ک گەلەیل جهان فرە پێشکەشی و قوربانی ئەرا مقەیەتیکردن کەلتووریان دان، و ئیمەی کورد هەمیش قوربانیەیل فرەیگ دایمن و هیمان پێشکەش کەیمن ئەرا مقەیەتیکردن زوان داڵگیمان و کەلتوورمان.
وهەمیش ئووشێد؛ وە شەش پارچەی کەلتووری دەس وەپی کردن ک خوەیان هی باوکم بوین جوور چشتەیل کشتوکاڵی بوین، تا ژمارەیانش رەسیە ١١٣٥ پارچە، وخاسیەگە ئەراک خەلک دێریک و ٦٤ ئاوای دەورگردی چوودەو لە کورد وعەرەو ومەسیحیەگان ک پارچەیلیگ ئاسەواری بینەزیریگ ئەرام هاوردن، و لەڕی ئاژانسەگەدان بانگواز ئەرا خەڵک ناوچەگە کەم و هەر کەسیگ پارچەی کەلتووری نەختیگ دیرێد بارێدەی ئەرا پێشەنگاگەم.
لە پێشەنگای ئەبو شەڤان سەدان پارچەیلیگ هەس ک تەمەنیان جووراجورە، و کۆنەترینەگەی چوودەو ئەرا زیاتر لە ٢٠٠ ساڵ،. و هەسیش لەناونی ٧٠ تا ١٠٠ ساڵ، ک خوەی ئامێرەیل پیشەیی تایبەت وە پیاون (کشتوکاڵی، جفتیاری، ئاسنگەری، راوکردن، خەرگین، سەوەتەی قامیش، و دەسڕەنگین ژنانە).
ئەبو شەڤان دووپات کەێد ک گشت میوانەیل پێشەنگاگەی لە چینە لات و ناوڕاسیەگەن، ک سیاسی ودەوڵەمەنەگان سەردانی نێەکەن، و هیچ دەسمیەتییگ نەیانە.
ئومیدەگەی ئەبو شەڤان ئەوەسە ک پێشەنگاگەی فراوانترەو بکەێد، تا فرەترین ژمارە لە پارچە کەلتووریەگان بگرێد، و بوودە شوونیگ ئەرا بۆنە کوردیەگان، و کۆڕ و سیمینارەگان، و کردنەوەی خولە کوردیەگان لەناوی بوود.
