هەولێر و سلێمانی کەفنە ئامادەباشی ئەرا لافاو

پارێزگای هەولێر لە بەیاننامەیگ رەسیە ئاژانس شەفەق نیوز وت: ئمڕوو گردەوبوینیگ وە ئامادەبوین سەرۆک شارەوانیەیل وەڕیەو برد، لەباوەت ئەو ریکارەیلە ئەرا نواگردن رخ لافاوەیل لە هەولێر.

وتیش؛ ئومێد خۆشناو پارێزگار هەولێر فەرمان دادە گشت لایەنەیل پەیوەندیدار وە هەماهەنگی هاوبەش لە ماوەی ساعەتەیل ئایندە ئەرا نواگردن هەر لافاویگ.

لەلای خوەییش، ئیدارەی قایمقامیەت سلێمانی ریکارەیلی ئەرا نواگردن ئەو وارانەیلە راگەیان ک مەزەنە کریاگە لەی رووژەیلە بوارێد.

ئیدارەگە لە بەیاننامەیگ رەسیە ئاژانس شەفەق نیوز وت: ژوور ئۆپراسیۆن لە فەرمانگەیل حکومەتی پەیوەندیدار دروس کریار ئەرا نواگردن ئەو وارانەیلە ک مەزەنە کریاگە لەی رووژەیل کەمە بوارێد.

وتیش: ئەوەسا ژوورەگە ریکارەیل وەرجەوەخت جیوەجی کەێد، و ئەرا نواگردن هەر رویداویگ گردەوبوین کوتپڕ کەێد.