هەولێر و سلێمانی ئاهەنگ رووژ ژن کەن لەناو تەقەلایل ئەرا نواگیریکردن لە تونوتیژی و سەرکوتکردنیان
ئەمیندار گشتی ئەنجومەن باڵای کاروبار ژنەیل لە هەرێم کوردستان پەخشان زەنگەنە لە پەراوێز گردەوبوینەوەگە کە وەلایەن کۆمەڵیگ ژن و چالاکوانەیل لە هەولێر رێکخریا وە ئاژانس شەفەق نیوز وت" تەقەڵا دەیمن ئەرا وەجیهاوردن دادپەروەری کۆمەڵایەتی تا ژنەیل بتوەنن جیگەیگ شایستە ئەرا خوەیان لە کۆمەڵگا وەدەسبارن، و توایمن نواگیری لە تونوتیژی و سەرکوتکردن ژنەیل بکەیمن".
لە سلێمانی، وەڕێوەبەرایەتی گشتی رووشنهویری و هونەر ئاهەنگیگ هونەری رێکخستن وەبوونەی جەژن جەهانی ژن.
ئەندامیگ لە لیژنەی سەرپەرشتیار ئاهەنگەگە کوێستانی وە ئاژانس شەفەق نیوز وت، "وەڕێوەبەرایەتی گشتی رووشنهویری و هونەر ئێ ئاهەنگە رێکخستیە وەبوونەی یاد جەهانی ژن کە خاڵیگ گرنگە لە مێژووی ژن".
وتیش "ئاهەنگەگە پێشانگایگ کارەیل دەسڕەنگی گرێدە خوەی کە وەلایەن فەرمانبەرەیل رووشنهویر و هونەر رێکخریاس هەمیش پەخشردن فیلمیگ دۆکۆمێنتاری لەباوەت کارکردن ژن لە مەکۆی رووشنهویری و مویزیک پێشکەش کریا وەگەرد رێزگردن لە فەرمانبەرەیل ژن".
