ناوخۆی هەرێم کوردستان راگەینێد ووردەکاریەیل نوویگ لە پەلامارەگەی هەولێر
شەفەق نیوز/ وەزارت ناوخۆ لە هەرێم کوردستان، ئمڕوو سێشەممە، راگەیان ک گورزە مووشەکیەگە ک دوێەکە دووشەممە فڕۆکەخانەی ناودەوڵەتی هەولێر کردە ئامانج، خوەی هاوشێوەی ئەو پەلامارەسە ک پارەکە بوی.
وەزارەتەگە لەبەیانامەیگ رەسیە ئاژانس شەفەق نیوز وت: دویای پەلامارەگەی دوێەشەو لە ساعەت ٩:٣٠ لە رووژ ٢٠٢١/٢/١٥ ، چەن مووشەکیگ داگە فڕۆکەخانەی ناودەوڵەتی هەولێر و چەن گەڕەکیگ لە هەولێر، ک گیان یەک کەس لە دەس دا، و هەیشت کەس زەخمدار کرد، پەنج لەلیان لەناو فڕۆکەخانەگە، و سێیان لەناو شارەگە، و هەمیش زەرەدەیلیگ دارایی وە ژمارەیگ لە ماڵەکان و بەرژەوەنیە بازرگانیەگان.
بەیاننامەگە وتیش؛ دویای ئەوە ک هێزەیل دژە تیرۆر و ئاسایش و پۆلیس دەسکردنە لێکۆڵینەوەی کوتپڕیگ، وەدەسمیەتی هێزەیل هاوپەیمان ناودەوڵەتی، ماشینیگ لە مارکەی (کەیا) پەیا کریا، چەن مووشەکیگ بار کردگە.
بەیاننامەگە ئاماژە کرد ک دیارە ک پەلامارەگەی دوێەشەو وە خود میکانزم و رەفتارەگەی پەلامارە وەرینەگە لەبان فڕۆکەخانەی ناودەوڵەتی هەولێر جیوەجی کریاگە، و هیمان لێکۆڵینەوەگان ئەرا ئاشکراکردن خاوەنەیل پەلامارەگە وەردەوامن، و دووپات کرد ک ئەوەسا گشت ئەوانەگ دەسیان هاناو پەلامارەگە رسوا کریەن و سزای خوەیان بەن.
