نێچیروان بارزانی پیرووزبایی لە بافڵ تاڵەبانی کەێد وە بوونەی دووارە هەڵوژاردنی ئەرا سەرۆکایەتی یەکێتی
2023-10-02T14:09:13+00:00
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، وە پەیوەندییگ تەلەفۆنی، پیرووزبایی لە بافڵ تاڵەبانی کرد، وە بوونەی سەرکەفتن کۆنگرەی یەکێتی نیشتمانی کوردستان، و دووارە هەڵوژاردنی جویر سەرۆک.
نویسینگەی راگەیانن سەرۆکایەتی هەرێم کوردستان، لە بەیاننامەیگ رەسیە ئاژانس شەفەق نیوز وت: نێچیروان بارزانی ئومید سەرکەفتن ئەرا سەرۆک و سەرکردایەتی یەکێتی نیشتمانی کوردستان لە ئەرکەیلیان خوازێد، وەو ئومیدە کە یەکێتی و پارتی و هیزەیل سیاسی کار ئەرا قایمکردن هاوکاری و یەکڕزی و هەماهەنگی و کار هاوبەش بکەن، و گشتی ئەرک خوەیان لە مقیەتیکردن مافەیل دەستووری هەرێم کوردستان جیوەجی بکەن.
لەلای خوەییش، سەرۆک یەکێتی نیشتمانی کوردستان سوپاس لە بارزانی کرد لەبان پەیوەندیی و پیرووزباییکردنی و بەشداریکردنی لە کۆنگرەی حزبەگە.
