نێچیروان بارزانی دەسمیەتی پیشکەش کەێد و هوشداری لە جیاوەبوین زیاتر و قویلکردن قەیرانەیل لە بەغداد دەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، دووپات لە ئامادەبوین سەرکردەیل کورد کرد ئەرا پیشکەشکردن هەر دەسمیەتییگ وەخاتر دەرچگن لی قەیران سیاسیە، و هوشداری لە جیاوەبوین زیاتر وقویلکردن قەیرانەیل کرد.
بارزانی لە بەیاننامەیگ رەسیە ئاژانس شەفەق نیوز وت: وە دڵسووزی و نیگەرانی فرەیگ نووڕیمنە گەشەیل سیاسی لە عراق، ک وەرەو وەردەوامی زیاتر لە جیاوەبوین و قویلکردن قەیرانەیل فرەتر تا فرەتر چوود، ودویرخستن ئاسوەیل چارەسەری.
وتیش: رەوشەگە دیرێد دویارووژ وڵاتەگە و ئاشتەوایی کۆمەڵایەتی بخەێدە نوای مەترسییگ جدی، و پەک گشت کار سیاسی و حکومەت و دامودەزگایل بخەێد.
بارزانی وتیش: خوەینشاندان شارستانی ئاشتەوایی مافیگە شەرعی ک دەستوور مقەیەتیی کەێد، وەلی پەکخستن دامودەزگایل دادوەری قەیرانەگە زیایەو کەێد، ئەراوە داوا لە گشت لایەنەیل و خوەینشاندانەرەیل کەیمن مقەیەتی دەزگایل و ئاشتی کۆمەڵایەتی بکەن، و لە کڕ ئاشتەوایی و شارستانی دەرنەچن.
وتیش: وڵاتەگە دی زیاتر لەی قەیرانەیل سەختە و رەوشەیل ئاڵووزە هەڵنیەگرێد، و وەردەوامی ژاوەژاوەگە زیاتر رەسێدە زەرد وە گشت گەل عراق.
بارزانی دووپات کرد ک ئیمە لە هەرێم کوردستان دووارە دووپات کەیمن ک ئیمە جویر هەمیشە بەشیگیمن لە چارەسەری، و ئەوەسا گشت دەسمیەتییگ ئەرا وەدەسهاوردن رەسینەوە وئاشتەوبوین ناوبەین لایەنەیل عراقی پیشکەش کەیمن.
لە کۆتایی وتیش: وڵاتەگە گفتوگۆ نیشتمانی جدی و وەرپرس لەناو لایەنەیل سیاسی خوازێد، وەخاتر پەیاکردن چارەیگ لە بنەمای دەستوور، و ئەوە تەنیا ریە راسەگەس ئەرا دەرچگن لە قەیرانەگە وبەسیان سیاسی و رەسین وە وڵاتەگە وەرەو هشکایی ئارام.
