نێچیرڤان بارزانی و ماکرۆن هاوڕان کە زیایبوین ئاڵووزی سەقامگیری ناوچەگە خەێدە مەترسی
یەیش لە بەیاننامەیگ هات کە سەرۆکایەتی هەرێم کوردستان بڵاوی کرد، کە باس لەو گردەوبوینە کرد کە ئمڕوو هەردگ سەرۆک لە کۆشک ئەلیزێە لە پاریس ئەنجامی دان.
لە بەیاننامەگە هاتیە، لە دیداریگ دووانی، هەردوگلا نووڕینیان لەباوەت پەیوەندییەیل فەرەنسا وەرد عراق و هەرێم کوردستان، پەیوەندییەیل هەولێر و بەغدا و دیالۆگ وەخاتر چارەسەرکردن گرفتەیلیان، رەوش سیاسی و ئەمنی و ئابووری عراق و دویاترین پیشهات و ئاڵووزییەیل ناوچەگە.
وەگورەی بەیاننامەگە، هەردوگلا زوور لەبان پتەوکردن پەیوەندییەیل فەرەنسا وەرد عراق و هەرێم کوردستان و چەسپیان هاوکاری هاوبەشی ناوەین هەردوگلا لە چوارچیوەی ڕێککەفتن ستراتیژی عراق و فەرەنسا کردن، هەرلیوا لەبان گرنگی پاراستن ڕێککەفتن ئاسایش و سەقامگیری عراق لەوەر رووشنایی رەوش قەیراناوی هەرێم، و وەردەوامی لەیەکفامستن و دیالۆگ وەخاتر چارەسەرکردن گرفتەیل هەولێر - بەغدا.
لەباوەت رەوش قەیراناوی خوەرهەڵاتی ناوڕاس، لە بەیاننامەگە باس ئەوە کریا کە هەردوگلا زوور لەبان گرنگی تەقەلا ئەرا ریگریکردن لە فراوانبوین جەنگ و مقیەتیکردن هاوڵاتیەیل مەدەنی و رەسین وە هاوکارییە مرۆییەیل ئەرا زیانلیکەفتگەیل کرد، نشانەس ئەرا ئەوەگ هەردگ سەرۆک هاوڕا بوین لە نووڕینیان کە شیواشیو زیاتر رەوشەگە بیوەیی و سەقامگیری ناوچەگە خەێدە مەترسی.
دویاترین پیشهاتەیل رویوەڕویبوین تیرۆر و مەترسییەیل داعش، پەیوەندییەیل عراق و هەرێم کوردستان وەرد وڵاتەیل هاوسا و ناوچەگە، رەوش سوریا و بڕیگ باوەت بەرژەوەنی هاوبەش، باسەیل ناو ئەو دیدارە بوین.
