مەسعود بارزانی: وەگەرد کازمی هیمان دەرفەت هەس ئەرا چارەسەرکردن گرفتەگان ناوبەین هەولێر و بەغداد

مەسعود بارزانی: وەگەرد کازمی هیمان دەرفەت هەس ئەرا چارەسەرکردن گرفتەگان ناوبەین هەولێر و بەغداد
2020-08-16T09:46:32+00:00

شەفەق نیوز/ مەسعود بارزانی سەرکردەی کورد سەرۆک پارت دیموکڕات کوردستان، ئمڕوو یەکشەممە، وەبۆنی هەفتاو چوارم ساڵیاد دامەزرانن حزبەگە، پەیامیگ  بڵاوکرد، لەناوی دووپاتکرد لە گرنگی دابینکردن مووچەگان وخاسەوکردن رەوش ژیان وگوزرانی خەڵک هەریم کوردستان، وچارەسەرکردن ناکۆکیەگان و باوەتە گیرهاتگەگان ناوبەین هەولێر و بەغداد لەبان دەستور

سەرکردەی کورد لە پەیامەگە وت: وەبۆنی شانزەی ئاب، وهەفتاو چوارم ساڵیاد دامەزرانن پارت دیموکڕات کوردستان ، گەرمترین پیرۆزبایی پێشکەشکەم ئەرا خیزانەیل شەهیدە بەڕێزەگان و پێشمەرگە قارەمانەگان و گشت ئەندام و پشتگیرەیل حزبەگە و جەماوەر گەل کوردستان

.


وتیش؛ دامەزرانن پارت دیموکڕات کوردستان ئاڵشبوین گرنگیگ لە مێژوو بزوتنەوەی ئازادیخواز کوردستانی بوی، ئەراوە بویە مەکتەبیگ نیشتمانی ئەرا خەباتکارە کوردەگان.

و ئامانج دامەزراننی لەو رەوشەیل سەختە خوەی وەزنی مەنین هەست سیاسی کوردی بوی، و پاڵپشتی لە بڕوایی تاک کورد وەخوەی بوی، هەمیش پارت دیموکڕات کوردستان لە گشت قۆناغەگان، لایەنیگ سەرەکی بوی و سومبولیگ ئەرا وەرگری لە مافەیل گەل کوردستان، و ئەوە وە قسە وکردەوە چەسپیا، و هەمیشە جی هیوای گەل کوردستان بوی، و لەخود وەختەگە نشانە و ئامانجیگ بوی ئەرا پیلانەیل دوژمنەگان و خاوەن خوەسەگان لەبان گەل کوردستان.

سەرۆک بارزانی ئاماژەدا ک ئی ساڵە، وئیمە یادکردنەوەی شانزەی ئاب کەیمن، گەلەگەمان کەفتیەسە وەر سەختیەیل وریگرەیل گەورایگ، و کوردستان هانووای گرفتەیل ئابووری و تەندروسی و جوورا جوور پیلان دوژمنەیل، و ئەو ریگرەیل و سەختیەیل و پیلانەیلە هیلێد ئەرکەیل پارت دیموکڕات کوردستان و سەرکردە وکادر وئەندام و پشتگیرەیلی سەختتر بوود لە هەر وەختیگ تر، و ئەرا وەپشتسەرنان ئی رەوشەیل سەختە، گرنگە ک وەرپرسەیل حزبەگەمان لە ئاست ئەوە بوون ک لەلایەن جەماوەر چەوەڕی کریاگە، و بوونە کاریگەری ئەرا چارەسەرکردن گرفتەیل خەڵکەگە، وهەمیش گرنگە ک گشت لایەنگرەیل حزبەگە، وەرپرسایەتیە سەرەکیەگە هەڵگرن لە مقەیەتی هەرێم کوردستان و گەشە کردنی، و رەنجەیلیگ زیاتر لەواکان بیەن ئەرا کوردستانیگ وەهێزتر.

هەمیش وت: لەی بۆنە دووپاتکەیمن لە پەیام پێکەوەژیان و فراوانی وئاشتەوایی ناوبەین کوردستانیەگان، چوونکە یەکیگ لە گرنگترین ئەرکە سەرەکیەگان ئەرا پارت دیموکڕات کوردستان خوەی مقەیەتی لەبان پێکەوەژیان پێکهاتە ئاینی ونەتەوەییەگانە لەناو کوردستان، ومقەیەتی لەبان ئاشتی کۆمەڵایەتی وسیاسی ناونی کوردستانیەگان.

لەباوەت پەیوەندیەگان ناوبەین هەولێر و بەغداد، سەرۆک بارزانی وت: لە دریژایی مێژوو خەبات وسیاسی پارت دیموکڕات کوردستان دانووستان رەت نەکردگە، و خوازێد گرفتەگان لە ری لەیەکڕسینەوە وەریە ئاشتەواییەگان چارەسەر بکەێد، و لەی وەختیشە، دووپات کەیمن لە وەردەوامی لەبان ئەو رینما، و ک خەبات پارت دیموکڕات کوردستان کەفێدە وەل خەباتکارەیل ونیشتمانییە کوردستانیەگان ئەرا چەسپانن مافە دەستوریەگان گەل کوردستان، و ئەرا نواگردن لەو هویر و مەغزە ک خوازێد خەبات و قوربانی گەل کوردستان دویرەو بخەێد و هاوبەشەگەی لەناو دەوڵەت عراق، یا ئەوەیگ خوازێد پێکهاتەی هەرێم کوردستان لە واتەگەی خوەی چووڵەو بکەێد، ک خوەی بەرەی سەد ساڵە لە خوین سەدان هەزار لە شەهیدەیل، وئەسر سەدان هەزار لە داڵگ شەهیدەیل، خاس زانیمن ک ئەوەیگ ئیسە هەس نەگونجیاگە وەگەرد قوربانیە گەوراگان و نووڕستنە ئازادیخوازەگان گەلەگەمان، وەگەرد ئەوەیش، مەزەنە دیریمن ک وەگەرد موستەفا کازمی سەرۆک وەزیران ئیسەی عراق، ک رەسینەوە لە باوەت گەل کوردستان دیرێد، هیمان دەرفەتەگە وازە ئەرا چارەسەرکردن گرفتەگان ناوبەین هەولێر و بەغداد لە چوارچیوەی دەستور، و رەسین هەردوگلاگە ئەرا ئانجامەیل خاسیگ، ئەو دەستورە ک ئەگەر جوور خوەی جیوەجی بکریاد، وەنە فرە لە گرفتەگان  ناوبەین هەولێر و بەغداد ئیسە نەوی.

بارزانی وتیش: لە ساڵیاد هەفتاو چوارم ئەرا دامەزرانن پارت دیموکڕات کوردستان، تیریمنە یاد کوردستانیە خۆشەویستەگان، ئەنجامەیل یەکێتی ئەرا خواست خەباتی کورد، و لە جیابوینەوە پەیا نەوی، ئەراوە خوەی سومبول وناوەند یەکێتیە و یەکێتی خواست گەل کوردستان، ولەی بنەما، و چوونکە خوەی باوەڕدارە ک گشت سەرکەفتن و دەسکەفتنەگان ک ئەرا گەل کوردستان ئەنجام دریاگە، وەختا خۆشەویستی وبرایی لەناونی لایەنە سیاسیەگان بوی ئەنجام دریا، ک خوەی هەمیشە  ئامادەیە ئەرا برایەتی وئاشتی و یەکێتی ریز.

بارزانی داوا لە پارت دیموکڕات کوردستان و لایەنە سیاسیەگان کرد وەیەکەو وە هەست برایەتی کار بکەن، و وەرپرسایەتی هەڵگردن ئەرا وەپشتسەرنان سەختی و گرفتەگان ک هەڕەشە لە هەرێم کوردستان دەن، وخوازم دووپات بکەم لەبان راسی گرنگی مووچە لە ژیان هاووڵاتیەیل، و لەبان گرنگی هاوکاری گشتی ئەرا چاکسازی گشتگیریگ لە هەرێم کوردستان و عراق، وچارەسەرکردن گرفتەگان و هەوڵداین ئەرا خاسەوکردن رەوش ژیان وگوزرانی هاووڵاتیەیل، وهەمیش گرفتەیل سەرەکی مەترسیداریگ هەس لە هەرێم کوردستان، ک نەبایەس لە هویرەو بچوود و بایەسە جوور بنەما بوود، جوور هاوبەشی وجیوەجی کردن دەستور و مادەی ١٤٠ و پێشمەرگە و سیاسەت ئاڵشتکردن دیمۆگڕافی، و ئەوە گشتی گرنگی تایبەتیگ دیرێد، و نەبایەسە کوڵبڕ گرفتەیل گەڵ کوردستان وەتەنیا مووچەگان بکریەێد.

و دووپاتکرد ک ئەو تەعریبە لەناوچە کوردستانیەگان ک لە سەدەی بیسەم دەسکردە پی، وەداخەو هیمان وەردەوامە وە شیوەیلیگ جیواز، و بایەسە ئەو کارەیل غەدرە وە زویترین وەخت بووسیەێد، و چارەسەرکردن ئەو تەعریب و ئاڵشتکردن دیمۆگڕافیە ک دژوە کورد لە ناوچە کوردستانیەگان لە دەیشت ئیدارەی هەرێم جیوەجیکریا، هەمیش دوینمن ک گرنگە داوا لە هێزە کوردیەگان لە ئەو بەشەگان بکەم چەودیری رەوشەیل هەریم کوردستان بکەن، ونەوونە کاریگەری ئەرا زیان رەسانن وە هەرێم کوردستان، چوونکە گەل کوردستان زەرەد و گورز و گرفتەیلیگ زیاتر دی هەڵنێگرێد، وداوا لە دەوڵەتەیل هاوسا و هێزە کوردیەگان کەم رێز لە سەروەری کوردستان و عراق بگرن، و کوردستان نەکەنە مەیدانیگ ئەرا ململانەگان لە ناونی خوەیان.


Shafaq Live
Shafaq Live